Saatlı rayon xəstəxanasının baş həkimi əlillik təyin edilməsi üçün sənədləri saxtalaşdırıb – Baş Prokurorluq

Bakı/04.08.21/Turan: Saatlı Rayon Mərkəzi Xəstəxanasında (RMX) saxta əlillik dərəcəsinin verilməsi ilə bağlı daxil olmuş müraciət əsasında rayon prokurorluğunda araşdırma aparılıb. Bu barədə rayon prokurorluğunun bu gün yaydığı məlumatda deyilir. 

Məlumatda sənədlərin saxtalaşdırılmasına yol verildiyi vurğulanır. 

Məlumata görə, Saatlı Rayon Mərkəzi Xəstəxanasının baş həkimi Adəm Əliyev baş beyin qan dövranının pozulması xəstəliyinə görə müavinət almaq üçün ona müraciət edən qohumuna kömək etmək məqsədilə xəstəxananın digər vəzifəli şəxsləri ilə tibbi sənədləri saxtalaşdırıb. 

Bunun nəticəsində həmin şəxsə 01.06.2019-cu il tarixdən 31.12.2019-cu il tarixədək Dövlət Sosial Müdafiə Fondunun Saatlı rayon şöbəsi tərəfindən əmək qabiliyyətinin müvəqqəti itirilməsinə görə 2 min 976 manat məbləğində pul müavinətinin ödənilməsi təmin edilib.

Məlumatda vurğulanır ki, Saatlı rayon prokurorluğunda Cinayət Məcəlləsinin 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi başlanıb. -05D-