Sabah yağıntı kəsiləcək

Bakı/21.01.21/Turan: Güclü yağıntı səbəbindən yanvarın 21-də qar örtüyünün hündürlüyü  Qaxda 45 sm., Ordubad – 27sm., Şamaxı- 25 sm., Daşkəsən- 22 sm., Şərur – 20sm., Şəki, Gədəbəy, Qusar – 18 sm., Qəbələ, Şəki, Altıağac- 17 sm., Lerik- 14 sm., Göygöl- 13 sm., Şahbuz- 12 sm., Quba- 11 sm., Yardımlı- 10 sm., Sədərək- 9 sm., Xaçmaz- 7 sm., Salyanda 6 sm. Olub. Bu barədə Ekologiya və Təbii Sərvətlər Nazirliyi Milli Hidrometeorologiya Xidməti məlumat yayıb.

Məlumatda deyilir ki, düşən yağıntının miqdarı Bakıda və Abşeron yarımadasında  aylıq normanın 51 faizi qədər olub.

Şimal-qərb küləyi arabir Neft Daşlarında 20, Sumqayıtda19, Naftalan, Qum adasında 18, Çilov adası, Bakıda 17, Pirallahıda 15 m/s-dək güclənib. Neft Daşları stansiyasının məlumatına əsasən dənizdə dalğanın hündürlüyü 4.2 metrə çatıb.

Havanın temperaturu iqlim normasından 2 dərəcə aşağı düşüb, havanın minimal temperaturu Bakıda və Abşeron yarımadasında 0 dərəcəyə yaxın, aran rayonlarında 2, dağlıq rayonlarda 8-11, yüsək dağlıq ərazilərdə 14-20, Naxçıvan MR-da 7-11 dərəcə şaxta olub.

Milli Hidrometeorologiya Xidməti bildirir ki, yanvarın 22-də Bakıda və Abşeron yarımadasında şimal-qərb küləyi gündüz mülayim cənub-qərb küləyi ilə əvəz olunacaq. 

Havanın temperaturu Bakıda və Abşeron yarımadasında gecə 0-2 dərəcə şaxta, gündüz 5-7 dərəcə isti olacaq.

Sabah Azərbaycanın rayonlarında hava şəraiti əsasən yağmursuz keçəcək. Ayrı-ayrı yerlərdə duman olacaq, qərb küləyi bəzi yerlərdə arabir güclənəcək. 

Havanın temperaturu gecə 2-7 dərəcə şaxta, gündüz 4-7 dərəcə isti, dağlarda gecə 10-15, yüksək dağlıq ərazilərdə 18-23, gündüz 0-5 dərəcə şaxta olacaq. Dağlıq və dağətəyi rayonlarda yolların buz bağlayacağı gözlənilir.—03D06-