Şagirdləri zorakılıqdan qorumaq mexanizmləri hazırlanıb

Bakı/11.03.21/Turan: Şagirdlərə qarşı zorakılıq hallarının müəyyən edilməsi, qeydiyyatının aparılmasına dair profilaktika mexanizmləri hazırlanıb. Bu barədə təhsil naziri Emin Əmrullayev öz Feysbuk səhifəsində yazıb.

Nazir şagirdlərin akademik uğurları ilə yanaşı, onların psixoloji sağlamlığını, təhlükəsizliyini və rifahını vacib məsələ adlandırır.

Nazir şagirdlərin təkcə təhsil almalarını yox, həm ailə daxilində, həm məktəbdə onlarla çoxtərəfli və düzgün münasibət qurulmasını mühüm hesab etdiyini bildirir: “Məktəbdaxili qısnama (bullinq) halları ilə mübarizə, ənənəvi və sosial mediada yeniyetmələrlə bağlı həssas məqamların düzgün əks etdirilməsi və digər faktorların həyatımıza yaxından təsir etdiyinin şahidi oluruq”, deyə nazir vurğulayır.

E.Əmrullayev əlavə edir ki, bullinq və şagirdlərə qarşı zorakılıq hallarının müəyyən edilməsi, qeydiyyatın aparılması, hər bir halın araşdırılması və zəruri tədbirlərin görülməsinə dair proflaktika mexanizmləri hazırlanıb.

Onun sözlərinə görə, bu mexanizmlər yaxın gələcəkdə məktəblərdə tətbiq ediləcək. Bullinqlə mübarizəyə dair 4000 müəllimə və 2000 nəfər məktəb rəhbərinə təlimlər keçirilib.

Təhsil naziri bu istiqamətdə 2020-ci ildə görülmüş işlərlə bağlı deyir ki, 226 məktəbdə 400 min şagirdi əhatə edən “Məktəblinin Dostu” layihəsi icra olunub, uşaq psixologiyası üzrə 800 nəfər psixoloqa təlimlər keçirilib.

UNICEF-in dəstəyi ilə 300 nəfər psixoloq üçün cəbhəyanı bölgələrdə təlimlər təşkil olunub. 

E.Əmrullayev deyir ki, məsələ bir şəxsdə və ya qurumda deyil, məktəbin, valideynin və geniş ictimaiyyətin bu məsələlərin həllində xüsusi rolu var: “Hər bir şagirdimizin psixoloji rifahı, sağlamlığı və təhlükəsizliyi Təhsil Nazirliyi üçün prioritetdir”, - deyə nazir qeyd edib.

Xatırladaq ki, 2021-ci il martın 9-da Lökbatan qəsəbəində 16-17 yaşında iki məktəbli qız özünü binanın damından yerə ataraq intihar edib. Buna qədərsə daha bir tələbə qız intihar etmişdi. -05D-