Salyanda "Müsəlman Birliyi" Hərəkatının fəalı saxlanılıb

Bakı/12.01.23/Turan: Salyan rayonunda "Müsəlman Birliyi" Hərəkatının üzvü Mirsultan Bağırov saxlanılıb.

Hərəkatdan Turan-a bildiriblər ki, Bağırov yanvarın 11-də Salyanda saxlanılıb. Hesab edirlər ki, digər dini fəallar kimi Bağırova da narkotik maddələrlə bağlı ittiham irəli sürüləcək.

Yerli KİV-in məlumatına görə, Bağırov "İranın casus şəbəkəsinin aşkar edilməsi üzrə əməliyyat çərçivəsində" saxlanılıb. Son ildə 100-dən çox dini fəal həbs edilib və onların əksəriyyətinə qarşı  narkotik maddələrin qanunsuz dövriyyəsilə bağlı ittihamlar irəli sürülüb.

"Azərbaycanda Siyasi Məhbusların Azadlığı Uğrunda" İttifaqın siyasi məhbuslar siyahısında 183 dindar var, onlardan 58-i "Müsəlman Birliyi" Hərəkatının üzvüdür. 48 nəfər 2021-ci ilin dekabrından sonra həbs edilib.

Bu, hakimiyyətyönlü KİV-də "İranın casus şəbəkəsinin ifşası" kimi qələmə verilsə də, sonradan onlara qarşı narkotik maddələrlə bağlı ittihamlar irəli sürülüb. –03B06-