Saxlanılan jurnalistlər saxlanma şəraitindən narazıdır

Bakı/16.07.20/Turan:  İyulun 14-də gecə saatlarında Milli Məclisin qarşısında hadisələrin foto və video çəkiliş edərkən saxlanılan müstəqil jurnalistlər Anar Abdullayev və Firudin Səlimov (Firi Səlim) saxlanma şəraitindən narazıdır. 

Bunu Turana jurnalistlərin yaxınları məlumat verib. Məlumata görə, Abdullayev və Səlimov saxlandıqları Binəqədi Rayon 4 saylı polis bölməsində balaca otaqda digər 3 nəfər ilə birlikdə saxlanılırlar. "Balaca otaqda beş nəfərdilər. Yatmaq üçün şərait yoxdur. Gecə stulları birləşdirib yatıblar. Otaq ayaqyolunun yanındadı deyə, otaqda pis iy var. Həmçinin orada daim siqəret çəkilir, havasızlıqdır. Belə şəraitdə yemək yemək mümkün deyil. Yeməyə gəlincə, saxlanılanlar dünən saat 20 radələrində yemək yedilər, bu gün onlara isə yalnız saat 16 radələrində yemək və su çatdırmağa imkan yaradıldı. Bütün bu müddət ac-susuz idilər. Səhər yalnız quru peçenye yeyiblər". 

Ombudsman Aparatın İşgəncələrin qarşısının alınması şöbəsinin müdiri Rəşid Rumzadə Turana bildirib ki, məsələ ilə bağlı qurumun qaynar xəttinə məlumat daxil olub. "Şəxslərin yaxınları qaynar xəttə zəng vuraraq məlumat verdilər. Biz də lazımi tədbirləri görürük. Vəkillə görüş məsələsi həll olundu. Yeməklə bağlı müraciəti biz araşdırırıq. Hər halda orada yemək və su ilə bağlı problem ola bilməz. Şəxslərin saxlanma şəraiti ilə bağlı və ya vəkillə görüşü ilə bağlı hər hansı problem olarsa, yaxınları bizim qaynar xəttə bu barədə məlumat verə bilər, biz kömək etməyə hazırıq". 

Bakı Şəhər Baş Polis İdarəsindən isə Turana bildirilib ki, quruma məsələ ilə bağlı məlumat verildi, məsələ araşdırılır.-0-