Saxlanıldıqdan sonra Ağəli Yəhyayevin işgəncəyə məruz qaldığı bildirilir

Bakı/04.09.23/Turan: “Müsəlman Birliyi" Hərəkatının İdarə Heyətinin üzvü Ağəli Yahyayev saxlanıldıqdan sonra polisdə işgəncələrə məruz qalıb. Bu barədə onun xanımı Şəhanə Həsənova bugünkü mətbuat konfransında bildirib.

Onun sözlərinə görə,  sentyabrın 3-də həyat yoldaşı Kürdəxanı İstintaq Təcridxanasından zəng edib və saxlanma şəraiti barədə danışıb.

"Ağəli dedi ki, onu Mehdiabad qəsəbəsində svetoforda saxlayıblar. Daxili İşlər Nazirliyinin Baş Narkotiklərlə Mübarizə İdarəsinin əməkdaşları onu saxlayıblar və  Mehdiabad polis şöbəsinə aparıblar və orada dəhşətli işgəncələrə məruz qoyublar. Ona deyiblər ki, narkotik maddə ilə bağlı cinayət törədildiyini etiraf etsin, "bu, yuxarının göstərişdir".

"Onun qarşısında çox ağır şərtlər qoyublar, bundan sonra o, etirafedici ifadə vermək məcburiyyətində qalıb", - xanımı deyib.

Bu, Yəhyayevin cinayət ittihamı üzrə üçüncü həbsidir. İlk dəfə 2010-cu ilin fevralında dini yürüşdə iştirak etdiyi üçün həbs edilib və 4,5 il həbs cəzası alıb.

İkinci dəfə 2015-ci ilin noyabrında Nardaran işi üzrə həbs olunub və 15 il həbs cəzasına məhkum edilib. 2021-ci ildə əfv ilə azad edilib.

Hüquq müdafiəçiləri hər iki iş üzrə onu siyasi məhbus kimi tanıyıblar.

Xatırladaq ki, Ağəli Yəhyayev avqustun 31-də saxlanılıb, sentyabrın 1-də məlum olub ki, ona qarşı Azərbaycan Cinayət Məcəlləsinin 234.4.3-cü (külli miqdarda narkotik maddənin qanunsuz dövriyyəsi) maddəsilə ittiham irəli sürülüb. Məhkəmənin qərarı ilə barəsində həbs qətimkan tədbiri seçilib. 30C