Siyasi məhbusların vəziyyəti müzakirə edilib

Bakı/10.01.19/Turan: Yanvarın 10-da Siyasi Məhbusların Müdafiə Mərkəzi bir qrup vətəndaş cəmiyyəti institutlarının iştirakı ilə ölkədə siyasi məhbusların vəziyyətinə dair Müsavat Partiyasının qərargahında dinləmələr keçirib.

Son günlər aktuallıq kəsb edən bloger Mehman Hüseynova qarşı cinayət işinin başlanması və buna etiraz olaraq M.Hüseynovun aclıq aksiyasına başlaması xüsusi diqqət mərkəzində olub.

Çıxış edən natiqlər hakimiyyətin etiraf etməməsinə baxmayaraq, ölkədə 150 nəfərdən yuxarı siyasi məhbus olduğunu vurğulayaraq, bu halı birmənalı olaraq pisləyiblər.

Natqilərin, demək olar ki, hamısı belə hesab edirlər ki, bu qədər siyasi məhbusun olması özü ölkədə insan haqlarının hansı vəziyyətdə olmasının göstəricisidir.

Çıxış edənlər belə bir yanaşmada da həmrəy olublar ki, bütün siyasi məhbuslar və o cümlədən M.Hüseynov həbsdən azad olunmalıdır, ölkədə siyasi məhbus olmamalıdır.

Tədbirin ikinci hissəsi də olub. Belə ki, yanvarın 10-u hazırda həbsdə olan siyasi məhbuslar Əfqan Muxtarlı və Fuad Əhmədlinin ad günlərinə təsadüf edir. Bu şərəfə tədbir iştirakçıları rəmzi "tort kəsmə" mərasimi keçirərək siyasi məhbuslara ad günlərini azadlıqda keçirmək arzularını ifadə ediblər.

Xatırladaq ki, ölkənin bir sıra hüquq müdafiə qurumları ölkədə 150 nəfərdən çox siyasi məhbus olduunu bildirsələr də, rəsmilər bunu təkzib edirlər. Hakimiyyət ölkədə siyasi məhbus olmadığını, həbs olunanların konkret cinayət əməlinə görə həbs oldunduqlarını bildirir.--0--