Siyasi məhbusların yenilənmiş siyahısı dərc edilib

Bakı/25.11.9/Turan: Noyabrın 25-də siyasi məhbusların vahid siyahısının tərtib edilməsi üzrə İşçi Qrup yenilənmiş siyahını dərc edib. Siyahıya 112 nəfərin adı daxil edilib. Daha 11 nəfərin işi monitorinq altındadır.

112 nəfər aşağıdakı qruplara ayrılıb:

- 5-i jurnalist və blogerlər (Araz Quliyev, Elçin İsmayıllı, Əfqan Muxtarlı, Ziya Əsədli, Polad Aslanov), 

- 7-si siyasi və ictimai fəallar (Fuad Əhmədli, Orxan Baxışlı, Mirfeyzulla Seyidov, Saleh Rüstəmov, Aqil Məhərrəmov, Babək Həsənov, Paşa Umudov),

- 45-i inanclı fəallar – bu qrupa “Nardaran işi” üzrə həbs edilənlər, İslam Partiyasının lideri Mövsüm Səmədovla birlikdə həbs edilənlər və digərləri daxil edilib,

- 3-ü ömürlük həbs olunma cəzasına məhkum olunmuşlar (Keçmiş Xüsusi Təyinatlı Polis Dəstəsinin üzvləri Elçin Əmiraslanov, Arif Kazımov və Səfa Poladov),  

- 1-i siyasi girov - Emin Saqiyev – o, siyasi mühacirətdə olan müxalif jurnalist Türkel Azərtürkün qohumudur,

- 3-ü Səid Dadaşbəyli və onunla birgə tutulanlar,

- 48 nəfərdən ibarət böyük bir qrup “Gəncə işi” ilə bağlı tutulanlardır,

Monitorinq altında olan 11 nəfərə gəlincə, onların 9-u “Gəncə işi” ilə bağlı həbs edilənlərdir. Bundan başqa, qanunsuz narkotik dövriyyəsi ittihamı ilə həbs edilmiş jurnalist Şəfəq Ağabalayevanın (Ağacan) və qardaşı siyasi mühacirətdə olan, Azərbaycan hakimiyyətini kəskin tənqid edən idmançı Renad Əliyevin işi də monitorinq altındadır.

Əvvəlki hesabatdan (3 sentyabr) sonrakı dövr ərzində 8 nəfər azadlığa çıxıb. Onlardan 5-nin, o cümlədən “Gəncə işi”nin 4 fiqurantının və hüquq müdafiəçisi Əliabbas Rüstəmovun cəzası yüngülləşdirilib.

AXCP fəalı Asif Yusifli də daxil olmaqla, daha üç nəfər cəza müddəti başa çatdığına görə azadlığa çıxıb.

Bundan başqa, Gəncə işi üzrə həbs edilmiş Eşqin Quliyev həbsxanada xəstəlikdən dünyasını dəyişib.

Siyahıya iki nəfərin – AXCP fəalı Paşa Ümidovun və Aqşin Əsgərovun adı daxil edilib.

Bundan başqa, İşçi Qrup siyasi motivli inzibati həbslərin sayının artdığını qeyd edir. Belə ki, müxalifətin 19 oktyabr aksiyası ərəfəsində və aksiyadan sonar 40-a yaxın fəal həbs edilib.

İşçi Qrup qeyd edir ki, siyasi motivli inzibati həbslər adi təcrübəyə çevrilir. İlin əvvəllərindən 100 nəfərə yaxın insan həbs edilib.

İşçi Qrup beynəlxalq ictimaiyyəti bu bədnam təcrübəyə son qoymaq məqsədilə Azərbayan hökumətinə təzyiq göstərməyə çağırır.

İşçi Qrupa Azərbaycan vətəndaş cəmiyyətinin görkəmli nümayəndələri, o cümlədən İntiqam Əliyev, Anar Məmmədli, Xədicə İsmayılova, Rövşən Hacıbəyli və başqaları daxildir. -06D-