Siyavuş Novruzovun davranışındakı ziddiyyətlərin səbəbi

Baku/24.08.20/Turan: Azərbaycan Elmlər Akademiyasının prezidenti Ramiz Mehdiyevin avqustun 18-də Bakının Novxanı qəsəbəsindəki evdə nəvəsinə toy etməsilə yaranan qalmaqal getdikcə böyüyür və daxili siyasi hakimiyyət münaqişəsinə çevrilir. Avqustun 31-də Azərbaycanda koronavirus pandemiyasına görə karantin müddəti başa çatmalıdır. Belə ki, karantinlə əlaqədar ölkədə kütləvi şənliklər qadağan edilib. Buna görə də Novxanıda toy ictimaiyyət arasında hiddətə səbəb olub, toyun bütün iştirakçılarının cəzalandırılması tələbləri ortaya çıxıb. İctimaiyyətin sorğusuna cavab olaraq, avqustun 23-də qanunsuz yığıncağın daha 19 iştirakçısı cərimələnib, bundan öncə şənliyin iki bilavasitə təşkilatçısı 15 sutkalığa həbs cəzası alıb.

Avqustun 24-də siyasi xarakterli cəza tədbirləri başlayıb. Hakim Yeni Azərbaycan Partiyasının icra katibinin müavini Siyavuş Novruzov istefası ərizəsi verib, Ramiz Mehdiyev isə məzuniyyətə çıxıb. Sosial şəbəkələrdə R.Mehdiyevin Akademiyadan çıxarılması və S.Novruzovun deputat statusundan məhrum edilməsi tələb olunur. O həm də Milli Məclisin İctimai birliklər və dini təşkilatlar komitəsinin sədridir.

İctimaiyyət əsasən S.Novruzovun ziddiyyətli çıxışlarından hiddətlənir. Novxanıda toy haqda xəbər mətbuatda yayıldıqdan dərhal sonra o bu toyda olduğunu və bundan təəssüflənmədiyini söyləyərək kəskin bəyanat verib. Bundan öncə S.Novruzov karantin rejimini pozanlara qarşı cəzaların sərtləşdirilməsinə tərəfdar olmuşdu, odur ki, ictimaiyyət qəzəblənərək onun özünə qarşı cərimə sanksiyalarının tətbiq edilməsini tələb edib. Sonda S.Novruzov və xanımı, ombudsman Səbinə Əliyeva toyda iştiraka görə 400 manat (240 dollar) cərimələniblər.

S.Novruzov R.Mehdiyevi yalanda ittiham edərək deyib ki, R.Mehdiyev onu nəvəsinin toyuna dəvət edərkən karantin günlərində şənliyin keçirilməsi üçün ölkə prezidentinin özündən icazə aldığını deməklə S.Novruzovu sakitləşdirib. Və hətta prezident İ.Əliyev şəxsən telefon danışığında R.Mehdiyevi təbrik edib. R.Mehdiyev bu təbriki qonaqlara da çatdırıb.

S.Novruzov əlavə edib ki, Prezident Administrasiyasının rəhbəri olduğu uzun illər ərzində onun karyera yüksəlişinə mane olan R.Mehdiyevlə yaxın olmayıb.

Əgər belədirsə, onda niyə R.Mehdiyev S.Novruzovu nəvəsinin toyuna dəvət edib və deputat niyə toyda iştiraka razılaşıb, üstəlik kütləvi şənliklərə qadağa qoyulduğu vaxtda?

Belə məlumat var ki, S.Novruzov “yalançı Mehdiyev”ə hücumla kifayətlənməyərək DİN və Ədliyyə Nazirliyini onun cərimələnməsi  zamanı qanunu pozmaqda ittiham edəcək. O, Milli Məclis deputatının toxunulmazlığı haqda qanunun 12-ci maddəsinə və Azərbaycan Respublikası Konstitusiyasının 90-cı maddəsinə istinad edə bilər.

I. Səlahiyyət müddəti ərzində Azərbaycan Respublikası Milli Məclisi deputatının şəxsiyyəti toxunulmazdır. Azərbaycan Respublikası Milli Məclisinin deputatı səlahiyyət müddəti ərzində cinayət başında yaxalanma hallarından başqa, cinayət məsuliyyətinə cəlb edilə bilməz, tutula bilməz, onun barəsində məhkəmə qaydasında inzibati tənbeh tədbirləri tətbiq edilə bilməz, axtarışa məruz qala bilməz, şəxsi müayinə edilə bilməz. Azərbaycan Respublikası Milli Məclisinin deputatı cinayət başında yaxalanarsa, tutula bilər. Belə olduqda Azərbaycan Respublikası Milli Məclisinin deputatını tutan orqan bu barədə dərhal Azərbaycan Respublikasının baş prokuroruna xəbər verməlidir.

II. Azərbaycan Respublikası Milli Məclisinin deputatının toxunulmazlığına yalnız Azərbaycan Respublikası baş prokurorunun təqdimatına əsasən Azərbaycan Respublikası Milli Məclisinin qərarı ilə xitam verilə bilər.

Lakin deputat Erkin Qədirli Facebook-da yazır ki, S.Novruzova cərimə tətbiq edilərkən qanunlar pozulmayıb, çünki deputatın polis və ya məhkəməyə zorla gətirilməsi, həmçinin onun saxlanması baş verməyib. S.Novruzov ona qarşı cərimə sanksiyasının tətbiq edilməsi barədə məlumatlandırılıb ki, hüquq-mühafizə qurumunun buna hüququ var.

İctimaiyyət arasında Azərbaycanda qarşıdakı hay-küylü siyasi hadisə barədə şayiələr dolaşır. Əsas kimi deputat Fəzail Ağamalının Demokrat.az saytına qalmaqallı müsahibəsi göstərilir. F.Ağamalı müsahibədə Ramiz Mehdiyevin ailəsini “erməni ailəsi” adlandırıb,  Prezident Administrasiyasının keçmiş rəhbəri tərəfindən prezident İ.Əliyevə qarşı “paralel hakimiyyət”in yaradıldığını bildirib. F.Ağamalı “Mehdiyevin komandası”nı beşinci rusiyapərəst kolon adlandırır, bu yaxınlarda saxlanılmış məmurları oraya aid edir və dövlət rəhbərliyində tezliklə “təmizləmə” tələb edir.

Siyavuş Novruzovun Azərbaycan avtoritar hakimiyyətinin patriarxı, toyda çıxış edən Bakı Universitetinin keçmiş rektoru Abel Məhərrəmovun onunla müqayisədə digərlərini “heç kim” adlandırdığı Ramiz Mehdiyevə gözlənilməz hücumlarını “yuxarılarda belə təmizləmə” gözləntisilə izah etmək olar. —0—