Tələbə fəallar sərbəst buraxılıb (YENİLƏNİB)

Bakı/04.05.21/Turan: Mayın 3-də Azərbaycan İqtisad Universitetinin qarşısında aksiya keçirməyə cəhd edərək saxlanılan "Tələbə Güc Mərkəzi" və "Tələbə Tələbi" Təşkilatlarının üzvləri sərbəst buraxılıb.

Bu barədə Turana fəallar özləri məlumat verdi.

Onların sözlərinə görə, "Tələbə Güc Mərkəzi"-nin İdarə Heyətinin üzvü Əhməd Məmmədli saxlanılarkən fiziki və mənəvi təzyiqə məruz qalıb. "Bizi Bakı Şəhər Baş Polis İdarəsinə aparıblar. Yolda Əhməd Məmmədli təzyiqə məruz qalıb. İdarədə bizə təzyiq olmayıb, izahat alıb sərbəst buraxdılar".

Fəallar əlavə edib ki, idarədə 3 saat ərzində saxlanıldılar.

Məsələ ilə bağlı Daxili İşlər Nazirliyindən münasibət öyrənmək mümkün olmayıb. –21D06

*   *   *

2021 May 04 (Çərşənbə axşamı) 00:03:47

Tələbələrin Dövlət İqtisad Universitetinin binası qarşısında etiraz aksiyası

Bakı/03.05.21/Turan:  Bu gün Tələbə Güc Mərkəzi Təşkilatının üzvləri Azərbaycan Dövlət İqtisad Universitetinin binası qarşısında etiraz aksiyası keçirməyə cəhd ediblər. Onlar əllərində "Tələbəyə ədalət!" bannerini tutublar.

Aksiya iştirakçılarının sözlərinə görə, müəllimlər imtahanların keçirilməsi qaydalarına etiraz edən tələbələri təhdid edirlər.

«Tələbələrə imtahan sualları verilmir. Bu da təbii ki, tələbələrə çətinlik yaradır. Bundan əlavə biz tələb edirik ki, onlayn qaydada keçirilən dərslərdə qayıb limiti götürülsün», - etirazçılar aksiyanın məqsədini açıqlayıblar.

Bütün iştirakçılar – Rəvan Axundov, Əhməd Məmmədli, Fərid Cabbar, Tükəzban Qasımova və fəal Rüstəm İsmayılbəyli polis tərəfindən saxlanılıblar.

Öz növbəsində, Daxili İşlər Nazirliyinin mətbuat xidmətindən Turan agentliyinə bildiriblər ki, aksiya iştirakçıları ərazidən çıxarılıb, amma saxlanılan yoxdur.—06D-