Terrorçuluqda ittiham edilən erməni silahlı dəstənin 13 üzvünün cinayət işi məhkəməyə göndərilib

Bakı/22.06.21/Turan: Aprelin 22-də Bakı Ağır Cinayətlər Məhkəməsində erməni terror dəstəsinin üzvü olan Haykaz Hovanesyan, Varazdat Manukyan, David Stepanyan, Levan Tosunyan, Artur Baqdasaryan, Serop Avakyan, Varazdat Arutyunyan, Jora Manukyan, Hrayr Herabyan, Narek Qosparyan, Qriqor Kureqyan, Aşot Qevorkyan, Martin Aqramanyan cinayət işi üzrə məhkəmənin hazırlıq iclası başlayır.

Prosesə hakim Eldar İsmayılov sədrlik edəcək.

Ermənistan vətəndaşlarından ibarət bir qrup şəxs qanunsuz şəkildə odlu silah, onun komplekt hissələrini, döyüş sursatı, partlayıcı maddələr və qurğular əldə edərək qanunvericiliklə nəzərdə tutulmayan silahlı birləşmələr yaratmaqda ittiham olunur.

Rəsmi məlumatlara görə, onlar 2020-ci ilin 26-27 noyabr tarixlərində Azərbaycanın dövlət sərhəddini qanunsuz olaraq mütəşəkkil dəstə halında keçməklə Xocavənd rayonunun Hadrut qəsəbəsinin şimal-qərb hissəsində meşəlik və digər ərazilərində döyüş mövqeləri tutaraq 13 dekabr 2020-ci il tarixinədək ölkə ərazisində yerləşən müəssisə, idarə, təşkilatlara, habelə ayrı-ayrı şəxslərə silahlı basqınlar ediblər, ictimai təhlükəsizliyi pozmaq, əhali arasında vahimə yaratmaq, Azərbaycanın dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə insanların həlak olması, onların sağlamlığına zərər vurulması, əhəmiyyətli əmlaka ziyan vurulması və başqa ictimai təhlükəli nəticələrin baş verməsi təhlükəsi yaradan partlayış, yanğın və digər terror əməlləri törədiblər.

Adları sadalanan 13 təqsirləndirilən şəxs Azərbaycan Cinayət Məcəlləsinin 214.2.1, 214.2.3-cü (terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən odlu silahdan və silah qismində istifadə olunan predmetlərdən istifadə etməklə törədildikdə), 228.3-cü (mütəşəkkil dəstə tərəfindən qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə), 279.2-ci (qanunvericiliklə nəzərdə tutulmayan silahlı birləşmələrin və ya qrupların tərkibində müəssisələrə, idarələrə, təşkilatlara və ya ayrı-ayrı şəxslərə basqın etmə) və 318.2-ci (qabaqcadan əlbir olan bir qrup şəxs və ya mütəşəkkil dəstə tərəfindən Azərbaycanın dövlət sərhəddini qanunsuz olaraq keçmə) maddələri ilə ittiham olunur.

Bundan öncə həmin silahlı dəstənin 14 üzvünün barəsində cinayət işinin istintaqı yekunlaşdırılıb və məhkəməyə göndərilib.-03D-