«Tərtər işinə» görə məsul şəxslər hazırda iş başındadır” – R.Səfərov

Bakı/05.09.22/Turan: «Tərtər işi» ilə bağlı yenidən araşdırma başlanandan sonra zərərçəkənlər və hüquq müdafiəçiləri arasında şikayətlər var ki, işin təşkilatçıları, işgəncə verməyə təhrik edənlər, yüksək rütbəlilər hələ də azadlıqdadır, onların heç ifadələri belə alınmır. Halbuki zərərçəkənlər birbaşa onların adlarını hallandırırlar. 

Müdafiə Xətti hüquq müdafiə təşkilatının həmtəsisçisi Rüfət Səfərov Turana bildirib ki, «Tərtər işinə» görə məsul şəxslər hazırda iş başındadır.

Onun sözlərinə görə, həmin dövrdə baş verən cinayətləri eyni vəzifəli şəxslər araşdırır. «Bu da hüququn məntiqinə tamamilə ziddir. Bu baxımından mən ədalətli, hərtərəfli araşdırmanı gözləmirəm».

Hüquq müdafiəçisinin fikrincə, hazırda aparılan cinayət işi üzrə hər hansı hüquqi prosesdən daha çox siyasi proseslər var. «Əgər siyasi hakimiyyət qərar verərsə həmin yüksəkrütbəli şəxslər məsuliyyətə cəlb olunacaqlar. Əgər siyasi təlimat olmayacaqsa hələlik bizə bəlli olan həbslərlə kifayətlənəcəklər».

Baş Prokurorluğun Mətbuat Xidmətindən isə Turana bildirilib ki, istintaq zərurəti ilə əlaqədar lazımi şəxslər şahid qismində dindiriliblər və dindiriləcəklər. «İstintaqın konfidensiallığını tam açıqlaya bilmərik» - deyə qurumdan bildirilib.—21D-