Bakı/12.07.21/Turan: Tanınmış ictimai-siyasi xadim, keçmiş siyasi məhbus Tofiq Yaqublunun Gürcüstanda yaşayan anası vəfat edib. Amma dəfn mərasimində iştirak etmək üçün onu Azərbaycandan buraxmayıblar. Qadağa ona qarşı cinayət işi ilə əsaslandırılır.
Tofiq Yaqublu Turan-a bildirib ki, artıq yeddinci aydır ki, Bakı Apellyasiya Məhkəməsi heç bir səbəb göstərmədən onun işi prosesi təxirə salır.
Tofiq Yaqublunun oğlunu da Gürcüstana buraxmırlar. Gənc ordudan yeni tərxis olunub. Silahı təhvil verib, lakin onun da ölkədən çıxışından imtina edirlər, çünki hərbi biletində silahı təhvil verməsi barədə möhür yoxdur.
Yaqublu hesab edir ki, onun Gürcüstana getməsi üçün icazə yalnız Prezident Administrasiyası səviyyəsində verilə bilər. "Miqrasiya Xidməti və məhkəmə bu məsələ ilə bağlı qərar qəbul etməyə qadir deyil", - o deyib.
Vəkil Elçin Sadıqov Ombudsman Aparatına və Apellyasiya Məhkəməsinə müraciət edib. Ona deyiblər ki, bu gün məsələyə baxılacaq.
Gürcüstanın Bolnisi rayonunda Yaqublunun yaxınları bildiriblər ki, dəfn mərasimini yalnız sabahadək təxirə sala bilərlər.
Ombudsman Aparatından Turan-a bildiriblər ki, Yaqublunun işilə bağlı üçüncü şəxslərə məlumat verə bilməzlər.
Müsavat Partiyasının lideri Arif Hacılı sosial şəbəkələrdə yazıb ki, övladlara valideynlərlə vidalaşmaq qadağası heç bir çərçivəyə sığmır: “Bu davranışda ləyaqətli siyasi mübarizənin heç bir əlaməti yoxdur. Əgər süni yaradılmış problem gün ərzində həll edilməsə, bu, mövcud hakimiyyətin fəaliyyət tarixində növbəti qara ləkə olacaq."
*Tofiq Yaqublu 22 mart 2020-ci ildə yol-nəqliyyat hadisəsi və ailə cütlüyünə hücum ilə bağlı saxta iş üzrə saxlanılıb. Müxalifətçi ona qarşı təxribatın olduğunu bildirib. İstintaq Yaqublunun fiziki güc tətbiq etməsi və yol-nəqliyyat hadisəsi törətməsinə dair sübutlar təqdim etməyib. Buna baxmayaraq, sentyabrın 3-də o, dörd il və üç ay müddətinə azadlıqdan məhrum edilib.
Yaqublu uydurma cinayət ittihamına son qoyulmasını tələb edərək aclıq aksiyası elan edib və onu 17 gün davam etdirib. Beynəlxalq hüquq- müdafiə təşkilatları, Avropa İttifaqı, ABŞ məsələyə yenidən baxılmasına çağırıblar. Nəhayət, sentyabrın 18-də məhkəmə həbs qətimkan tədbirini dəyişib və Tofiq Yaqublunu ev dustaqlığına keçirib. –06D-
Cəmiyyət
-
Bakıda keçirilən COP29 konfransı mübahisələr və tənqidlərin kölgəsində başa çatdı. Tanınmış tarixçi Cəmil Həsənli bu tədbiri Prezident İlham Əliyevin rəhbərliyi altında Azərbaycanın idarəçilik problemlərinin parlaq əks olunması kimi xarakterizə etdi. Administrasiyanın qatı tənqidçisi olan Həsənli, COP29-u bahalı bir tamaşa adlandıraraq sistemli çatışmazlıqları üzə çıxardığını və Azərbaycanın siyasi və iqtisadi strukturlarına beynəlxalq diqqəti artırdığını vurğuladı.
-
Avropa Parlamenti Prezidenti Roberta Metsola azərbaycanlı iqtisadçı və siyasi məhbus, professor Qubad İbadoğlunu 2024-cü il Saxarov Mükafatı təqdimetmə mərasimində iştirak etmək üçün Strasburqa dəvət edib. Dəvət məktubu COP29 iqlim konfransı zamanı Avropa Parlamenti üzvü Maykl Bloss tərəfindən çatdırılıb. Lakin İbadoğlu hazırda ev dustaqlığında olduğu və Azərbaycandan çıxmasına qadağa qoyulduğu üçün dəvəti qəbul edə bilmir.
-
İstanbul Hava Limanında həyata keçirilən bir əməliyyat, diplomatik münasibətlərdə sarsıntı yarada biləcək bir hadisəni üzə çıxardı. Azərbaycan hərbi attaşesi olduğu iddia edilən Kəhrəman Şamil oğlu Məmmədov, 70 kiloqram qızıl ilə saxlanıldı. Türkiyə KİV-in məlumatına görə, Məmmədovun diplomat olması ilə bağlı açıqlamalarına baxmayaraq, hadisənin qızıl qaçaqmalçılığı ilə bağlı olduğu güman edilir.
-
Sərin bir noyabr axşamı, Bakının sakinləri Xəzər dənizinin sahilində toplaşaraq, sahilə vurulmuş nəhəng bir balinanın bədənini heyrətlə izlədilər. 16 metr uzunluğunda olan bu məxluqun cansız görünən forması və kəskin qoxusu bir çoxlarına ekoloji faciənin şahidi olduqlarını düşündürdü. Lakin bu gecə sirli qonaq artıq yox idi – yük platformasına yüklənərək hava limanına aparılmışdı.
Rəy yaz