Türkiyədən deportasiya olunmuş fəal açıqlama əldə etməyə çalışır

Bakı/22.04.21/Turan: İctimai fəal Qiyas İbrahimov Türkiyədən deportasiyası ilə əlaqədar Azərbaycan Xarici İşlər Nazirliyinə müraciət edib.

İbrahimovun Turan-a verdiyi məlumata görə, beş ay əvvəl o, Türkiyədə yaşamaq üçün bir illik icazə alıb. Bu yaxınlarda o, Azərbaycana ailəsinə baş çəkməyə gəlib. Türkiyəyə qayıtdıqda isə aeroportda ona üç ay ölkəyə girişinin qadağan edildiyini deyiblər və İbrahimov qayıtmaq məcburiyyətində qalıb.

Çərşənbə günü Türkiyənin Bakıdakı konsulluğundan fəala bildiriblər ki, onun bu ölkəyə girişi ömürlük qadağan edilib. Bunun səbəbini açıqlamayıblar.

Bu gün İbrahimov Türkiyə səfirliyinə müraciət edib, burada da qadağa olduğunu təsdiq ediblər və səbəbi izah etməyiblər, Türkiyənin Miqrasiya İdarəsinə müraciət etməyi tövsiyə ediblər.

“Biz Türkiyədə vəkil tutacağıq və bu məsələ ilə məşğul olacağıq. Mən Azərbaycan Xarici İşlər Nazirliyinə də zəng etdim, yazılı müraciət etməyi tövsiyə etdilər”, deyə İbrahimov bildirib.

O, həmçinin qeyd edib ki, hələ də Avropa İnsan Hüquqları Məhkəməsinin təyin etdiyi 36 min avro məbləğində təzminatı almayıb.

Xatırladaq ki, Qiyas İbrahimov digər fəal Bayram Məmmədovla birlikdə 2016-cı ildə Heydər Əliyevin Bakının mərkəzində yerləşən abidəsinə şüarlar yazdığına görə 10 il müddətinə azadlıqdan məhrum edilib. Üç il sonra o, əvf edilib. -21В06-