Vətəndaş cəmiyyəti fəalları 14-14 iyul hadisələri ilə bağlı bəyanat yaydılar

Bakı/18.07.20/Turan: Vətəndaş cəmiyyəti fəalları və hüquq müdafiəçiləri 14-15 iyul yürüşü və sonrasında saxlanılan şəxslərin azad olunması barədə bəyanatla çıxış ediblər. 

Bəyanatı hüquq müdafiəçilər Anar Məmmədli, Fuad Həsənov, Şəhla İsmayıl, Ziya Quliyev, Rəsul Cəfərov, Bəşir Süleymanlı, ictimai fəallar Bəxtiyar Hacıyev, Sevil Yuzbaşova, İlqar Hüseynli və 

Aynurə Abdullayeva, ekspert Sabit Bağırov, Demokratiya və Rifah Hərəkatının sədri Qubad İbadoğlu, 

“Gənc Liderlər” Təhsil İctimai Birliyin rəhbəri Səbinə Ələkbərova, ekoloq-eskpert Elçin Sultanov, 

hərbi araşdırmalar üzrə analitik Cəsur Məmmədov imzalayıb. 

İyulun 18-də yayılmış bəyanatda deyilir ki, vətəndaş cəmiyyətin nümayəndələri iyulun 12-dən başlayaraq, Azərbaycan-Ermənistan sərhəddinin Tovuz rayonu ərazisində başlayan hərbi toqquşmalar nəticəsində dövlət sərhəddinin pozulmasını, 12 hərbi qulluqcu və bir nəfər dinc sakinin həlak olmasını üzüntü ilə qarşılayıb, Ermənistan tərəfinin atəşkəs rejimin pozmasını qətiyyətlə pisləyiblər.  "Eyni zamanda bildiririk ki, bu itkilərlə bağlı qəzəblənmiş vətəndaşların iyulun 14-də gecə saatlarında Bakının mərkəzi küçələrində keçirdiyi yürüşlər əsasən dinc və sakit məcrada baş verib. Ancaq Milli Məclisinin qarşısında toplanmış yürüşçülər arasında kiçik qrup təxribat yaradaraq, parlamentin binasına daxil olmuş, bununla da polislə vətəndaşlar arasında gərginlik yaşanıb. Eyni zamanda bəzi şəxslər polis avtomobillərini aşırdaraq, gərginliyi daha da artırıb".

Fəallar bildirib ki, Milli Məclisin qarşısında yaşanan gərginlik az sonra polisin vətəndaşlara qarşı qeyri-mütənasib güc tətbiq etməsi ilə müşayiət olunmasından, yürüşü dağıtmaq üçün rezin güllələrdən, su şırnaqları və gözyaşardıcı qazdan istifadə edilməsindən təəssüf hissini keçirirlər. "Bunun ardınca səhər saatlarından başlayaraq gün ərzində müxtəlif şəxslər saxlanalaraq, Bakı şəhəri üzrə  polis bölmələrinə aparılıb. Saxlanılan şəxslərin kimliyi və sayı barədə məlumat verilməsə də, müxtəlif mənbələrə əsasən polis bölmələrinə 70-dək şəxs gətirilib. Biz 14 iyul gecəsi yürüşü işıqlandıran jurnalistlərə qarşı təzyiqləri qınayır, həmin gün heç bir səbəb göstərilmədən bloqerlər – Anar Abdulla, Firudin Səlimov və ictimai fəal Elvin Cəbizadənin saxlanmasını əsassız hesab edirik. Eyni zamanda yürüşdə iştirak edən Azərbaycan Xalq Cəbhəsi Partiyasının  fəalları – Asif Yusifli, Seymur Əhmədzadə, Məhəmməd İmanlı və Elvin Məmmədovun, NİDA Vətəndaş Hərəkatının fəalı Elgiz Qəhrəmanın saxlanmasını siyasi ayrı-seçkilik münasibəti kimi qiymətləndirir, müxalif təşkilatlara qarşı siyasi təqibləri pisləyirik".

Bəyanat müəllifləri narahatlqıla bildiriblər ki, son iki gün ərzində 70-dək şəxs polis bölmələrində 48 saatdan artıq müddətdə darısqal və şəraitsiz otaqlarda, ailə üzvləri və vəkilləri ilə ünsiyyətə imkan verilmədən, antisantitariya qaydalarına əməl olunmadan saxlanılıb. "Məhz bu səbəbdən  xronoki xəstəliyi olan fotoqraf Firidun Səlimovun halı pisləşib, polis bölməsində ona təcili yardım xidməti  çağrılıb. Biz 14 iyul aksiyası zamanı saxlanılan şəxslərə qarşı belə münasibəti yolverilməz və qeyri-qanuni hesab edərək, bu cür halların Azərbaycan Respublikası Konstitusiyası və milli qanunvericliyinin, habelə Avropa Insan Hüquqları Konvensiyasının müvafiq müddəalarının pozulması hesab edirik. Biz Azərbaycan hakimiyyətini vətəndaşların sərbəst toplaşmaq, ifadə azadlığı, azadlıq və ədalətli mühakimə hüquqlarına hörmətlə yanaşmağa dəvət edərək, 14 iyul aksiyasına görə saxlanılanlar barədə ədalətli araşdırmanın aparılmasını, vətəndaşların dinc yürüşünə xələl gətirən şəxslərin müəyyən olunaraq, ədalətli şəkildə mühakimə olunmasını vacib sayırıq".-0-