Wolt rəhbərliyinin etirazçılara cavabı /YENİLƏNİB/

Bakı/02.09.22/Turan: Wolt Azərbaycan şirkətinin baş meneceri Tofiq Süleymanov Turan-a bildirib ki, dünən və bu gün bir qrup kuryer Bakıda tətil keçirir. "Onların sifarişləri qəbul etməyib xidmət göstərməmək seçiminə hörmətlə yanaşırıq. Lakin, təəssüf ki, bu kuryer qrupu öz narazılığını başqa kuryerlərə maneəçilik törətmək ilə əks etdirir. Bu qrup populyar restoranların qarşısında yığışaraq işləmək istəyən kuryer-partnyorlara sifarişləri götürməyə imkan vermir".

Şirkətin rəsmisi qeyd edib ki, şirkət bəzi kuryerlərin narazı olub işləməməsinə anlayış ilə yanaşsa da, çoxluq təşkil edən razı kuryer-partnyorların güc ilə qarşısını kəsib, həm onların, həm də restoranların qazanc əldə etməsinə maneə olmasını heç bir şəkildə qəbul edə bilmir. "Biz bu məlumatı işləməyə çalışan başqa kuryer-partnyorlardan almışıq. Aldığımız məlumata əsasən, kuryerlər sifarişləri götürmək istəyən zaman bu qrup tərəfindən şifahi və fiziki cəhətdən təhdid və təhqir olunurlar. Çalışmaq istəyən kuryerlərin sifariş çatdıraraq pul qazanmağının yeganə yolu fiziki mübarizə yolu ilədir. Bu növ davranış qəbulolunmazdır və mütləq şəkildə dərhal dayandırılmalıdır. Qazanc əldə etmək istəyən kuryer-partnyorların işinə heç bir maneə göstərilməməlidir".

Qeyd olunub ki, hazırkı narazılıq avqust ayının 29-da ödəniş modelinə edilən dəyişikliklər ilə bağlıdır. "Bu dəyişikliklər öncədən 12 avqust tarixində detallı şəkildə bütün kuryer-partnyorlara təqdim olunmuşdur. Eyni zamanda, 15 və 16 avqust tarixlərində kuryer-partnyorların fikirlərini oyrənmək üçün müvafiq videogörüşlər keçirilmişdir".

Süleymanov bildirib ki, yeni modelə əsasən, kuryerin həm müştəriyə, həm də restorana/mağazaya qədər qət etdiyi məsafə naviqator əsasında hesablanır. "Əsas dəyişiklik məhz budur: öncə məsafə düz xətt ilə, indi isə naviqatora əsasən qurulmuş marşrut üzərindən hesablanır. Kuryer-partnyorlar bu dəyişikliyin tətbiq olunmasını uzun müddət ərzində xahiş edirdi və biz onların istəyini məmnuniyyət ilə həyata keçirdik".

Qeyd olunub ki, çatdırılan bir neçə sifariş üçün tək ödəniş olunması barədə iddialar var, lakin bu, həqiqəti əks etdirmir. "Eyni anda iki sifarişi çatdırarkən kuryer-partnyorlarımız həm götürülmə, həm də çatdırılma üçün iki dəfə ödəniş alır. Tapşırıq zamanı bütün nöqtələr (götürülmə və çatdırılma məkanları) arasındakı məsafələr naviqator əsasında hesablanır və kuryer-partnyorlara kompensə olunur. Belə ki, hər iki sifariş üçün kuryer-partnyorlara ədalətli ödəniş olunur və orta saatlıq qazanc, əvvəl də olduğu kimi, 5-6 AZN civarında qalır. Bəli, daha uzun məsafələr üzrə qazanclar əvvəlki ilə müqayisədə daha az ola bilər, lakin çoxluq təşkil edən orta və qısa məsafəli tapşırıqlar üzrə qazanclarda hesabladığımız kimi artım müşahidə olunur. Beləliklə, ümumilikdə orta saatlıq qazanc 5-6 AZN civarında qalır. Bu isə o deməkdir ki, orta statistik kuryer gün ərzində 8 saat işləməklə 40-50 AZN gündəlik qazanc əldə etmək imkanına malikdir".

Şirkətdən vurğulanıb ki, bu dəyişikliklərin ilkin narahatlıqlar doğurduğunu başa düşürlər, lakin atılan addımlar qazancı azaltmaq məqsədi ilə icra olunmayıb. "Biz kuryer-partnyorların effektivliyini artıraraq, hər zaman olduğu kimi, saatlıq qazancların yüksəlməsi üzərində çalışırıq və yeni ödəniş sistemi bu məqsədimizdə kömək edir. Biz məyus kuryerlərin fikirlərinə hörmətlə yanaşırıq və ilk gündən bəzi kuryer-partnyorlar ilə görüşlər keçirmişik. Görüşləri davam etdirib kuryerlərin fikirlərini dinləməyə açığıq, lakin hamını qanunlara riayət edərək, digər kuryer tərəfdaşlarına və restoranlara qarşı nümayiş etdikləri təzyiqə dərhal son qoymağa çağırırıq". -0-

*   *   *

2022 Sentyabr 02 (Cümə) 16:04:15

"Wolt Azərbaycan" şirkətinin kuryerləri yenə etiraz edirlər

Bakı/02.09.22/Turan: Sentyabrın 2-də "Wolt Azərbaycan" şirkəti ilə xidmət müqaviləsi əsasında əməkdaşlıq edən kuryerlər etiraz yürüşü keçiriblər.

Kuryerlər Koroğlu metrosunun yaxınlığında toplaşaraq şəhərin mərkəzi istiqamətində yürüşə başlayıblar.

Kuryerlər bildiriblər ki, şirkət onlara verilən xidmət haqqını azaldıb, bu səbəbdən də onlar boykota başlayıblar.

Koroğlu metrosunun yaxınlığında yerləşən körpünün altında toplaşan kuryerlərin sözlərinə görə, hazırkı tariflərlə işləmək sərf etmir. "Əsas qiymət 1,5 manat olmaqla 500 metrəyə qədər heç bir ödəniş olunmur. 500 metrdən sonra hər 100 metr üçün 3 qəpik tarif hesablanır. Bu da nəticədə çox az edir. Çoxumuz ailəliyik, borclarımız var. Şirkətdən bizə bildiriblər ki, bütün dünyada kuryer xidmətləri məsafəni yerlə yox, hava ilə ölçürlər. Amma dünyanın heç bir yerində uzun məsafələrə xidmət haqqı 1,5 manat etmir".

Kuryerlər dünəndən kütləvi boykota başlayıb. Onlar qeyd ediblər ki, uzaq məsafəyə aparılan sifarişlərə görə əvvəlkindən 1 manat 30 qəpik az ödəniş edilir. "İndi 3 kilimetrlik məsafəyə aparılan hər sifarişə görə təxminən 2,4 manat ödəyirlər. Əvvəl isə 3,7 ödəyirdilər. Bu da bizə heç cür sərf etmir. Üstəlik də eyni ünvana cüt sifariş aparılanda bir sifarişin xidmət haqqı ödənilir. Halbuki, əvvəl iki sifarişin xidmət haqqı ödənilirdi".

Onların sözlərinə görə, tarifin dəyişməsinə baxmayaraq, müqavilədə heç bir dəyişiklik edilməyib. "Yəni müqaviləyə görə biz daha çox almalıyıq, amma nədənsə az alırıq".

Kuryerlər qeyd ediblər ki, xaricdə Wolt şirkətilə əməkdaşlıq edən tanışlar var və onların xidmət haqlarında heç bir dəyişiklik yoxdur. "Wolt beynəlxalq şirkətdir və dəyişikliklər hamıya şamil edilməlidir, amma niyəsə məhz Azərbaycanda işləyən kuryerlərə şamil olunur".

Onlar deyiblər ki, tariflər köhnə qayda ilə hesablanmayana qədər kuryerlər işə çıxmamağa qərar veriblər.

Kuryerlər bildiriblər ki, dünən başlayan kütləvi boykotdan sonra bir neçə nəfəri işdən uzaqlaşdırıblar, bir neçə nəfəri isə Bakı Şəhər Baş Polis İdarəsinə dəvət ediblər. "Amma bizim tələblərimiz yerinə yetirilməyənə qədər işə çıxmayacağıq".

Ərazidə olan polis əməkdaşları kuryerlərə xəbərdarlıq edib ki, körpünün altında toplaşmaq olmaz, bundan sonra isə kuryerlər yürüşə başlayıblar.

Məsələ ilə bağlı Wolt Azərbaycan şirkətindən bildiriblər ki, gün ərzində kuryerlərin etirazılarına cavab veriləcək.

Bu ilin aprel ayında da Wolt Azərbaycan şirkəti ilə əməkdaşlıq edən kuryerlər boykot aksiyası keçirmişdi. O da xidmət haqlarının azaldılması ilə bağlı idi. Apreldəki etirazdan sonra tariflərin əvvəlki üsulla ödənilməsinə başlanıb. 0