Xədicə İsmayıl: Məhbus qadın portreti

“Kameraya bir ədəd gül və 1 ədəd plitka şokolad verdilər.  8 martda kamerada olan 3 qadını Ədliyyə Nazirliyinin Penitensiar Xidmət İdarəsi məhz belə təbrik etdi”.  Bunu məhbus jurnalsit Xədicə İsmayıl təsvir edir.

Onun “Azadlıq” radiosuna Kürdəxanı həbsxanasından çatdırdığı məktubda deyilir ki, əslində Penitensiar Xidmət qadınlara ehtiramını başqa yolla göstərə bilərdi - məhbus qadınların portretrini cızan bir statistika aparmaqla.

Xədicənin özünün hazırladığı məhbus-qadın portreti belədir:

a) cənub bölgəsi - əsasən “milli maddə” (234 – narkotik vasitələrin qanunsuz dövriyyəsi) ilə məhkum olunanlar;

b) erkən nikahlar və təhsilsizlik səbəbindən baş verən cinayətlərin cəzasını çəkənlər;

c) kişilər tərəfindən cinayətə təhrik və ya məcbur edilənlər;

d) sevgi və ya qısqanclıq məhbusları.

Azərbaycanda qadınları həbsxanaya gətirən əsas səbəblərin yuxarıdakı siyahının a) və b) bəndlərinin olduğunu deyən Xədicə vaxtilə jurnalist kimi həmin problemləri qaldırdığını xatırladır.

“20 il əvvəl biz jurnalistlər cənub bölgəsinin problemləri və erkən nikahlar barədə danışanda bu nəticəni gözləməliydilər”.

Məhbus jurnalist bildirir ki, indi ölkənin şimal bölgəsində də eyni problem var və bir azdan bu problemin bütün ölkəyə yayılacağından ehtiyat edir.

“Azadlıq” radiosu xatırladır ki, yuxarıda sadalananlar Xədicənin jurnalist fəaliyyətində qaldırdığı və cəmiyyətin laqeyd qaldığı yeganə problem deyil.

Onun hakim elitanın qanunsuz biznesi, nepotizm və korrupsiya haqda araşdırmaları AzadAvropa/Azadlıq Radiosu rəhbərliyinin fikrincə Xədicənin həbsinin əsas səbəbidir.-03D