Xədicə İsmayılova ölkədən çıxışına qadağanın ləğvi üçün məhkəməyə müraciət edib

Bakı/22.09.17/Turan: Araşdırmaçı jurnalist Xədicə İsmayılova sentyabrın 22-də beynəlxalq tədbirdə iştirak etmək üçün Azərbaycanı müvəqqəti tərk etmək imkanı yaradılması və ya şərti cəza ilə bağlı ölkədən çıxma qadağasının tamamilə ləğv edilməsi haqqında Bakının Binəqədi rayon məhkəməsinə müraciət edib.

"Stohkolm İqtisadiyyat Məktəbinin Riqa filialından araşdırma jurnalistikasından noyabr-dekabr aylarında 23 gün dərs demək üçün təklif almışam. Bu məqsədlə müvəqqəti olaraq ölkəni tərk etmək və ya ölkəni tərk etməklə bağlı məhkəmə qərarına xitam verilməsi üçün müraciət etmişəm", deyə İsmayılova Turan-a bildirib.

Onun sözlərinə görə, məhkəmə ölkədən çıxma qadağasını tamamilə götürsə belə, o, Azərbaycanı həmişəlik tərk etmək niyyətində deyil.

İsmayılova 2014-cü ilin dekabrında həbs olunub. 2015-ci ilin sentyabrında məhkəmə jurnalisti iqtisadi ittihamlarla 7,5 il müddətinə azadlıqdan məhrum edib. İsmayılova təqsirli olduğunu qəbul etməyib. Beynəlxalq təşkilatlar onu siyasi məhbus kimi tanıyıb. 2016-cı ilin mayında Ali Məhkəmə real cəzanı 5 il sınaq müddəti olmaqla, 3,5 il müddətinə şrəti cəza ilə əvəz edib. Bundan sonra o, dəfələrlə peşə fəaliyyəti ilə əlaqədar ölkəni müvəqqəti tərk etməsi üçün məhkəmələrə müraciət edib, amma hər dəfə imtina cavabı alıb. -03B06-