�Xural� və iddiaçı barışdılar

Bakı/11.03.19/Turan: Binəqədi Rayon Məhkəməsində Fərid Əmirəliyevin sədrliyilə Yeni Azərbaycan Partiyası Nərimanov Rayon Ağsaqqallar Şurasının sədri Miri Həsənovun "Xural" saytının baş redaktoru Əvəz Zeynallı və klinika sahibi Şəfəq Nəcəfovaya qarşı şikayəti üzrə məhkəmə prosesi olub.

Proses zamanı hakim xüsusi ittihamçının vəkilindən ötən prosesə niyə gəlmədiyini soruşub. O, Ali Məhkəmədə olduğunu bildirib. Sonra xüsusi ittihamçının anket məlumatları açıqlanıb.

M.Həsənov bildirib ki, 80 yaşı var və 1976-cı ildən həmin evdə yaşayır. 2 ildir ki, bu evə görə Ş. Nəcəfova ilə arasında münaqişə yaranıb. "Sonuncu dəfə Nəcəfova məni məhkəməyə ona görə verdi ki, dediyinə görə, mən onun obyektinin bir hissəsini zəbt etmişəm. Məhkəmə ona 400 manat ödənilməsi barədə qərar çıxardı. Biz ikimiz də qərardan narazı qaldıq və apellyasiya şikayəti verdik. Lakin bu, o demək deyil ki, kimsə böhtan ata bilər, təhqir ed bilər. Zeynalov yazıb ki, "mən damda bağ salmışam". Mən işdə Ağsaqqallar Şurasının sədriyən, küçədə isə sadəcə Miri Həsənov. Niyə mənim vəzifəmi təqdim etməlidirlər, ekranda portretimi, İnternetdə evimin fotosunu yerləşdirməlidirlər? Bu yaşda məhkəmələrə getməyə məcburam. Mən həyatımı hakimiyyətə xidmətə həsr etmişəm".

Sonra tərəflər suallara keçiblər. Ə.Zeynallının vəkili Elçin Sadıqov M.Həsənovdan Ə.Zeynallının materialına qarşı etirazının nədən ibarət olduğunu soruşub.

-O dedi ki, "mən damda bağ salmışam". İnternetdə icazəsiz mənim fotomu, bayrağın fotosunu yerləşdirib.

-Əvvəllər İnternetdə fotonuz olub.

-Yüzlərlə. Amma bunu icazəsiz etmək olmaz.

Sonra hakim M.Həsənova suallar verib və onun fikrincə, Ə.Zeynalovun materialında hansı söyüşlərin yer aldığını soruşub. O cavab verib ki, hər şey iddiada göstərilib.

Məhkəmə prosesi zamanı birdən məlum olub ki, hazırlıq iclası keçirilmir, məhkəmə baxışı keçirilir. Ə.Zeynallı bildirib ki, hazırlıq iclası təxirə salınıb, odur ki, məhkəmə baxışı keçirilə bilməz. Ancaq hakim etiraz edərək deyib ki, hazırlıq iclası olub və dinləmələr təyin edilib. Öz növbəsində Ə.Zeynallı məhkəmənin qərarını tələb edib.

E.Sadıqov bildirib ki, məhkəmə zalındakı kameranın qeydlərinə baxılması üçün vəsatət verəcək. O əlavə edib ki, əgər dinləmələr təyin olunubsa, müttəhimlərə onların hüquqları və öhdəlikləri açıqlanmalıdır və onlar bu haqda protokolu imzalamalıdır. Bundan əlavə, məhkəmə onların barəsində həbs qətimkan tədbiri seçməlidir. O, tanış olmaq üçün həmin protokolları istəyib. Hakim deyib ki, protokolları iclasdan sonra verəcək. Bundan sonra Ə.Zeynallı, Ş.Nəcəfova və onların vəkilləri işin dayandırılması haqda vəsatət qaldırıblar, ancaq hakim həmin vəsatətlərə baxmayıb.

Lakin prosesin sonunda belə razılığa gəlinib ki, Ə.Zeynallı M.Həsənovun barəsində materialları İnternetdən çıxaracaq, öz növbəsində M.Həsənov xüsusi ittiham qaydasında şikayətini geri götürəcək. Məhkəmə bunu nəzərə alaraq iş üzrə icraatı dayandırıb.

Qeyd edək ki, Ş.Nəcəfova və M.Həsənov arasında münaqişə və məhkəmə çəkişməsi qarşılıqlı əmlak iddiası əsasında keçirilir. Belə ki, M.Həsənovun evi və Ş.Nəcəfovaya məxsus klinika bir-birinin yanında yerləşir. Bu yaxınlarda Ş.Nəcəfova qərara alıb ki, mətbuata müraciət etsin və jurnalistlər problemi işıqlandırsınlar. Ə.Zeynallı saytda "Miri Həsənov klinikanın damında bağ salıb" adlı məqalə dərc edib. Bundan sonra M.Həsənov Nərimanov Rayon Məhkəməsində Ə.Zeynallı və Ş.Nəcəfovanın barəsində xüsusi ittiham qaydasında CM-in 147 və 148-ci maddələri ilə iddia qaldırıb.

Nərimanov Rayon Məhkəməsi həmin məhkəməyə aid olmadığı üçün iddianı təmin etməyib. Bundan sonra Miri Həsənov Binəqədi Rayon Məhkəməsinə müraciət edib.-0-