Yanvarın 18-də Azərbaycanda koronavirusa qarşı vaksinasiya prosesinə start verilib

Bakı/18.01.21/Turan: Bu gün artıq Bakı Sağlamlıq Mərkəzində səhiyyə naziri Oqtay Şirəliyev və nazirin iki müavini, İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev, Tibbi Ərazi Bölmələrini İdarəetmə Birliyinin İdarə Heyətinin sədri Ramin Bayramlı və qurumların məsul əməkdaşları koronavirusa qarşı peyvənd olunublar.

Tibbi Ərazi Bölmələrinin İdarəetmə Birliyindən (TƏBİB) verilən məlumata görə, “Azərbaycan Respublikasının COVID-19 əleyhinə 2021-2022-ci illər üçün vaksinasiya strategiyası”na əsasən, peyvəndləşmənin ilkin mərhələsində səhiyyə işçiləri, 65 yaşdan yuxarı şəxslər və hüquq-mühafizə orqanları tərəfindən əks-epidemik tədbirlərə cəlb olunan heyət vaksinasiya olunacaq.

Fevralın 1-dən başlayacaq peyvəndləşmənin ikinci mərhələsində tibbi cəhətdən yüksək risk qrupu (tənəffüs sistemi, hemodializ, şəkərli diabet, piylənmə kimi xroniki xəstəlikləri olanlar), 50 yaş və daha yuxarı ən az bir xroniki xəstəliyi olan şəxslər, təhsil və sosial sektorda çalışanlar, sosial müəssisələrdə daimi yaşayanlar, ASAN Xidmət və DOST mərkəzləri, ictimai nəqliyyat sektorunun, telekommunikasiya operatorları və provayderlərinin və poçt sahəsində birbaşa əhali ilə təmasda olan işçilərin və bank sektorunun birbaşa əhali ilə təmasda olan hissəsi, yüksək riskli şəraitli işlərdə çalışan (cəmiyyətin fəaliyyəti üçün həyatı vacib sahələrdə çalışan - milli və regional təhlükəsizlik, ədliyyə, maliyyə və s.) şəxslər iştirak edəcək.

Yanvarın 16-da Nazirlər Kabineti yanında Operativ Qərargahın brifinqində bildirilib ki, ölkədə Çinin “Sinovac” şirkətinin istehsal etdiyi “CoronaVac» vaksinindən istifadə ediləcək və Azərbaycana əhalinin maksimum 40 faizinə çatacaq vaksin gətiriləcək.

Bəs vaksinasiya prosesinə nə dərəcədə hazırlıq görülüb? Bu proses nə dərəcədə sürətli aparılacaq? Ölkəyə gətirilən vaksin sayı kifayət edəcəkmi?

Səhiyyə Nazirliyindən Turan-a bildirilib ki, poliklinikalarda vaksinasiya üçün xüsusi otaqlar ayrılıb və bütün hazırlıq işlər görülüb. “Peyvəndlər doğru saxlanılmalıdır. Bu xüsusi bir məsələdir. Bunun üçün vaksinasiya həyata keçiriləcək bütün tibb məntəqələri soyuducular və termoçantalarla təmin edilib”.

Qurumdan qeyd edilib ki, vaksinasiya ilə bağlı poliklinikaya müraciət edən vətəndaşlar üçün bütün şərait və rahatlıq düşünülüb. “Vətəndaş poliklinikaya daxil olduğu zaman xüsusi işarələr onu birbaşa peyvənd olunacaq sahəyə yönləndirir. Peyvəndlər xüsusi ayrılmış peyvənd otaqlarında həkim nəzarəti altında ediləcək. Bu otaqların sayı qeydiyyat otağı, vaksinasiya otağı və müşahidə otağı olaraq bölünüb. İlk olaraq müraciət edən vətəndaş qeydiyyat otağında qeydiyyata alınır. Daha sonra vaksinasiya otağına ötürülür. Peyvəndlənmə olunduqdan sonra 30 dəqiqə ərzində vətəndaş müşahidə otağında yarana biləcək hər hansı bir əks təsirlə əlaqəli olaraq izlənməyə alınır. Bu müddət ərzində heç bir əlamət üzə çıxmazsa vətəndaş evə buraxılır”.

Səhiyyə Nazirliyindən əlavə edilib ki, peyvəndlənmə yalnız həkim yoxlanışı və göstərişi ilə vaksinlər təlim kursu keçmiş tibb işçiləri tərəfindən ediləcək. “Vaksinasiyadan öncə müvafiq olaraq sahə həkiminin yoxlanışından keçmək mütləqdir. Peyvənd ediləcək poliklinikalarda tibb işçiləri seçilərək xüsusi kurslara cəlb olunub. Burada əsas məqsəd tələb olunan əhaliyə uyğun sayda tibb personalının olmasıdır”.

İcbari Tibbi Sığorta üzrə Dövlət Agentliyindən Turan-a bildirilib ki, vaksinlər Azərbaycana mərhələli şəkildə gətiriləcək. “Artıq Çindən 2 milyon əhalini peyvənd etmək üçün vaksin alınıb. Bundan başqa, COVAX platforması ilə əməkdaşlıq çərçivəsində daha 2 milyon nəfər üçün vaksin alınması nəzərdə tutulub. Eyni zamanda, bizim GAVİ təşkilatı ilə imzalanmış sazişimiz var və biz GAVİ-dən də bəlli bir miqdarda, əhalinin 10 faizini peyvəndələyə biləcəyimiz qədər vaksinlərin gətirilməsi gözlənilir. GAVİ təşkilatı tərəfindən bizə hansı peyvəndlərin veriləcəyi barədə məlumat, hələ ki, yoxdur. Amma biz onlara peyvəndin necə olması ilə bağlı istəklərimizi bildirmişik. Bütün peyvəndləri biz düşünürük, amma əlçatanlıq və müddət məsələsi var. GAVİ-dən biz aprel ayında peyvəndi gözləyirik. Gələn ilə bir neçə peyvənd təklif olunacaq”.

Azərbaycan Həkimləri İctimai Birliyinin təsisçilərindən biri, həkim-radioloq Aydın Əliyev Turan-a bildirib ki, Çinin “CoronaVac” vaksini bütün sınaqlardan keçmiş keyfiyyətli vaksindir. “Onun tərkibində öldürülmüş virusdur. Öldürülmüş viruslar vaksinasiyada daha təhlükəsizdir. Avropada ən son texnologiya ilə hazırlanan peyvəndlərin illərlə sınaqdan çıxması barədə məlumat yoxdur. Orada müəyyən qədər qaranlıq məqamlar ola bilər”.

Ekspert qeyd edib ki, ölkəyə 4 milyon peyvənd gətirilib. “Bu o deməkdir ki, həmin peyvəndlər 2 milyon insana hesablanıb. Çünki bir nəfərə iki doza vaksin vurulacaq. Bu sayda peyvənd azdır”.

A.Əliyev hesab edir ki, vaksinasiya üçün nəzərdə tutulmuş tibb məntəqələrin sayı artırılmalıdır. “İşin təşkil edilməsində müəyyən qüsurlar var. Mən baxdım, Bakı şəhəri üzrə bəzi məntəqələrdə, bəzi poliklinikalarda məntəqələr təşkil olunub. Amma düşünürəm ki, bu, azdır. Misal üçün, Bakıda elə rayon var ki, heç orda məntəqə yoxdur və vətəndaş durub o rayondan başqasına getməlidir ki, peyvənd olunsun. Təbii ki, bu, çatışmazlıqdır, işi daha yaxşı təşkil etmək lazımdır. Daha çox məntəqələrdə bu işi icra etmək lazımdır ki, növbələr yaranmasın və insanlar rahat şəkildə vaksinasiyadan keçə bilsinlər. Avropanın bəzi ölkələrində vaksinasiya prosesi hətta apteklərdə təşkil edilib”.

Ekspert vurğulayıb ki, vaksinasiya yavaş-yavaş aparılsa nəticə olmaya bilər. “Çünki ilk vaksin olunan insanların immuniteti təqribən 4-5 aydan sonra zəifləmiş olur. 5 aya biz bu prosesi bitirməsək peyvənd olunmayan və digərlərini yoluxdura biləcək insanlar həmin vaksinasiya olunmuş insanları yoluxduracaq. Ən geci 6 aya biz vaksinasiya prosesini bitirməliyik”. -0-