Yasamal sakinləri üçün istirahət bağı inşa edilmədi, “Lake” otelinin yanındakı gölə ümid yoxdur

Bakı/05.09.20/Turan: İyul ayında (2020-ci il) Bakı şəhəri Yasamal rayon sakinlərinin müraciətindən sonra Turan vəziyyəti öyrənərək “Bakılılar sonuncu Yasamal gölünü xilas etməyə çağırırlar” məqaləsini dərc etdi. Məqalədə söhbət adı açıqlanmayan iş adamının Yasamal rayonunda Həsən Bəy Zərdabi və Akim Abbasov küçələrinin kəsişməsində “Üç Tac” yaşayış binalarının ətəyindəki balaca gölü qurutmaq niyyətindən gedirdi. Bildirilirdi ki, biznesmen gölün yerində növbəti hündürmərtəbəni inşa etmək niyyətindədir və bununla da Yasamal sakinlərini canlı təbiətdən qalan kiçik bir guşədən məhrum edəcək.

Bakının Yasamal Rayon İcra Hakimiyyətində bizə bildiriblər ki, hakimiyyət biznesmenə (şayiələrə görə, ərazi hövzənin sahilində inşa edilmiş “Lake” otelinin sahibinə məxsusdur) gölün qurudulmasını qadağan edib. O vaxtadək gölün bir hissəsi artıq torpaqla örtülmüşdü. İcra Hakimiyyətində dedilər ki, biznesmenə məkanı əvvəlki vəziyyətinə qaytarmaq tapşırılıb. Bu yerdə yerli sakinlərin istirahət guşəsini yaratmaq üçün abadlıq işləri aparılacaq.

Eyni zamanda sakinlər mətbuata bildiriblər ki, tikinti işləri  və gölün doldurulması müvəqqəti dayandırılıb ki, vətəndaşların sayıqlığı səngisin və sonra gölün yerində hündürmərtəbəli bina inşa edilsin. “Heç bir təmizləmə aparılmadı. Əksinə, Bakıdakı yeganə göl dolduruldu. Deyirlər ki, bina sahibləri ailəyə yaxın yüksək vəzifəli şəxslərdir”, - bakılı Eka Qarayeva saytlardan birində bu göl barədə dərc edilən materiala şərh yazıb. 

Sentyabrın 2-də müxbirimiz gölün qalan hissəsində olub, foto çəkib. Ərazi metal hasarla hasarlanıb, içərisində təhlükəsizlik işçisinin olduğu köşk qoyulub. O, sualları cavablandırarkən deyib ki,  nəyi qoruduğunu və burada hansı işlərin aparılacağını bilmir.

Bakılıların istirahəti üçün gözəl məkanın olmadığı kimi inşaat texnikası və tikinti zibili də olmayıb.

Yasamal Rayon İcra Hakimiyyətində icra başçısının köməkçisi Qabil Süleymanzadə Turan-a bildirib ki, bu ərazi ilə Bakı Şəhər İcra Hakimiyyətində məşğul olurlar. O, sualları paytaxt rəhbərinə ünvanlamağı məsləhət görüb. Yasamal rayonu ərazisinin bir hissəsi hansı əsasla Bakı İH-nin sərəncamına verilib və bu gölün sahibi kimdir? O bu suallara cavab verməyib.

Bakı İH-nin dörd telefonundan heç biri cavab vermir. İcra Hakimiyyətinin ümumi şöbəsinin işçisi Turan-ın suallarını dinləyib, bizə izahat verilməsi üçün telefon zəngini gözləmək təklif olunub. Məqsədimiz bu suala cavab almaqdır: Bakının Yasamal rayonunda sonuncu şəhər gölü ərazisində nə və nə zaman inşa ediləcək? Niyə orada sakinlərin rahatlığı üçün istirahət yerinin  yaradılması barədə vəd yerinə yetirilmir?

Bakıdakı bir çox analoji hadisələrlə bağlı şəhər administrasiyasının xüsusiyyətini bilərək ehtimal etmək olar ki, göl artıq “məhkum edilib”, o, gəlirli hündürmərtəbənin inşası üçün qurudulacaq.—0--