"YAŞAT" Fonduna bir ay ərzində 25 mln. manat yığılıb

Bakı/08.01.21/Turan: Şəhid ailələrinin və yaralanmış əsgərlərin ailə üzvlərinin ehtiyaclarının təmin olunması üçün yaradılmış "YAŞAT" Fonduna bu günə qədər 24 milyon 804 min 936 manat 86 qəpik vəsait yığılıb. Bu barədə bugünki mətbuat konfransında Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev bildirib.

Həmin vəsaitlərin 15 milyon 36 min 831 manat 71 qəpiyi fiziki şəxslər, 9 milyon 768 min 105 manat 16 qəpiyi hüquqi şəxslər tərəfindən köçürülüb.

Bu vəsaitin 883 min 278 manat 49 qəpiyi artıq şəhid ailələrinin və yaralanmış əsgərlərin ailə üzvlərinin ehtiyaclarının təmin olunması üçün xərclənib.

Ötən ay ərzində 2706 şəhid və 81 yaralının 11 mindən çox ailə üzvü ilə görüş keçirilib. 2787 ailənin 1483-ü öhdəliyə götürülüb. 

Mart ayından sonra Fond tərəfindən 2020-ci ilə qədər şəhid olanların ailələri və Qarabağ qazilərinə də yardım nəzərdə tutulub. Ağır yaralılar, yəni əlilliyə düşə biləcək yaralılar Fonda müraciət edə bilər.

Sosial şəbəkələrdə yardıma ehtiyacı olanlarla bağlı yayılan məlumatlara toxunan Mehdiyev deyib:

“Elə hallar olur ki, sosial şəbəkələrdə hansısa yaralının şəkli paylaşılır, ehtiyacı olduğu bildirilir. Amma araşdıranda məlum olur ki, həmin şəkli paylaşılan şəxs hərbi xidmətdədir və heç bir yardıma ehtiyacı yoxdur. Həmin şəxs bizdən tələb edir ki, bu şəkli paylaşanlar tapılsın və cəzalandırılsın”. -16D06-