Yeni hüquq müdafiə təşkilatı təsis edilib

Bakı/18.06.20./Turan:  Azərbaycanda yeni hüquq müdafiə təşkilatı - Bakı İnsan Hüquqları Klubu (BHİK) təsis edilib. Təşkilat hüquq müdafiəçisi Rəsul Cəfərov və vəkil Cavad Cavadov tərəfindən təsis edilib.

Təşkilatın əsas məqsədi Azərbaycanda insan hüquq və azadlıqlarının daha səmərəli müdafiəsinə yardım göstərməkdən ibarətdir. Hazırda birliyə üzvlərin seçilməsi prosesi davam edir. 

BHİK fəaliyyətini şəffaflıq və açıqlıq prinsipləri əsasında qurduğundan və ölkə qanunvericiliyi çərçivəsində daha səmərəli fəaliyyət göstərməkdə maraqlı olduğundan dövlət qeydiyyatına alınmaq üçün Ədliyyə Nazirliyinə müraciət edib. Əvvəlki təcrübələr nəzərə alınmaqla peşəkar şəkildə hazırlanmış sənədlər iyunun 1-də nazirliyə daxil olub. 

BHİK ölkə Konstitusiyası və qanunlarında, o cümlədən Azərbaycanın qoşulduğu beynəlxalq-hüquqi sənədlərdə, xüsusən də Avropa İnsan Hüquqları Konvensiyasında təsbit edilmiş birləşmək azadlığı hüququnun təmin edilərək təşkilatın qeydiyyata alınacağına inanır.

BHİK öz fəaliyyətini ölkə qanunları əsasında müvafiq dövlət qurumları ilə qarşılıqlı müzakirə və kommunikasiya şəraitində qurmaqla mövcud problemlərin həllinə töhfə vermək niyyətindədir.

Rəsul Cəfərov məşhur hüquq müdafiəçisidir. O, 2014-cü ildə uydurma iqtisadi cinayətlər törətmək ittihamı ilə həbs edilib və 6,5 il müddətinə azadlıqdan məhrum edilib. Elə həmin vaxt Avropa Məhkəməsi onun həbsini qanunsuz hesab edib. 2020-ci ilin aprelində Azərbaycan Ali Məhkəməsinin plenumu Strasburq Məhkəməsinin qərarını icra etmək üçün ona bəraət verib.

Cavad Cavadov insan hüquqlarının müdafiəsi məsələlərində ixtisaslaşan vəkildir. Bir çox siyasi məhbusu və polis zorakılığına məruz qalmış digər vətəndaşları müdafiə edib. -06D-