Yol polisi � detektor testi

Bakı/24.04.19/Turan: 2019-cu il aprelin 23-də saat 18:30-da Zaqulba-Bakı yolunun Zaqulba-Mərdəkan ayırıcında 388 nömrəli Dövlət Yol xidməti avtomobil patrulu tərəfindən Turan İnformasiya Agentliyinin direktoru Mehman Əliyevin avtomobili saxlanııb.

Sükan arxasında etibarnamə əsasında olan sürücü telefonla M.Əliyevə məlumat verib ki, polis avtomobildə quraşdırılmış radar-detektoru antiradar kimi təsnif edib və qurğunu götürüb. Həmçinin etibarnaməni götürüb və avtomobilin cərimə meydançasına aparılmasını, eyni zamanda 500 manat cərimə ödənilməsini tələb edir.

M.Əliyev telefonla polisə başa salıb ki, bu, antiradar deyil, radar-detektordur və bunun tətbiqi qanunla qadağan edilməyib. Məsələ bundadır ki, bu cihaz hələ smartfonların olmadığı zamanlarda buraxılıb və istifadə olunub. Bu gün bütün smartfonlardan və cepereeslərdən radar-detektor kimi istifadə etmək imkanları var və çoxları bundan maneəsiz istifadə edir.

Bakı Şəhər Baş Dövlət Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədovla əlaqə yaradılıb. Ona polisin qanunsuz əməlləri haqda məlumat verilib. Ancaq onun özbaşınalığın qarşısını almaqda gücsüz olduğu məlum olub.

Nəticədə radar-detektor götürülüb, etibarnamə alınıb. Sürücüyə Bakı Şəhər Baş Dövlət Yol Polisi İdarəsinin 9 saylı otağına getmək tapşırılıb.

"Sürücülərin təhsilinə yardım" Birliyinin sədri Fazil Məmmədov Turan-ın sualını cavablandırarkən Azərbaycanda radar-detektorların istifadəsinə icazə verildiyini təsdiqləyib və deyib ki, əgər yol polisi qurğunun onun radarına mənfi təsir etdiyini bildirirsə bunu sübut etməlidir.

O, polisini hərəkətini şərh edərkən deyib ki, yol polisi işçisinin sürücüyə məxsus salondan nəsə götürməyə, hətta avtomobilə toxunmağa, kapotu və ya qapını açmağı tələb etməyə ixtiyarı yoxdur. "Belə tələblər ancaq baxış zamanı ola bilər, bu isə hüquqi baxımdan tamamilə başqa vəziyyətdir".

F.Məmmədov radar-detektoru götürmüş polisin hərəkətini qanunsuz adlandırıb. "Belə hallarda vətəndaşlar DİN-in 102 telefon nömrəsinə zəng etməlidir və baş vermiş qanunsuzluq barədə məlumat verməlidir. Radar-detektorun sahibi ona məxsus əmlakın götürülməsinə icazə verməməkdə haqlıdır. O zaman polis post-patrul maşınını çağırıb bildirməlidir ki, sürücü polisin qanuni tələbinə müqavimət göstərir. Ancaq bu hərəkət qanunsuzdur və vətəndaş tərəfindən buna etiraz edilə bilər. 102 telefon edib bildirmək lazımdır ki, polis vətəndaşın mülkiyyətini götürməklə qanunu pozur", - ekspert bildirib.

Polisin hərəkəti protokollaşdırılmalıdır. Əgər polis öz hərəkətlərini sənədləşdirməyibsə, sürücüyə əşyanı götürməklə bağlı sənəd verməyibsə o zaman qanunu pozmuş olur. Vətəndaşın şikayətindən sonra cəzalandırıla bilər",- F.Məmmədov Turan-a açıqlama verib.

AR İnzibati Xətalar Məcəlləsinin 342.9-ci maddəsi radarların işinə müdaxilə edən, nəqliyyat vasitəsinin sürətini qeydə almaqda onlara əngəl yaradan antiradarların istifadəsini qadağan edir.

Arayış

Radar-detektor necə işləyir

Radar-detektor radar barədə öncədən xəbər verir və yolda müəyyən olunmuş sürətə əməl etməyə çağırır.

Antiradar necə işləyir

Antiradar polis radarlarının siqnal səsini boğur, yaranmış maneə səbəbindən polis pozucunun hansı sürətlə yaxınlaşdığını müəyyən edə bilmir. Belə qurğular qadağan edilib. Əgər maşında antiradar aşkar edilərsə müsadirə olunur, sürücü isə cərimələnir.

"Mən 10 ildən çoxdur ki, radar-detektordan istifadə edirəm və o, mənə trassda sürəti artırmamağa kömək edir", - M.Əliyev deyib. Yəni, radar-detektordan istifadə profilaktik xarakter daşıyır və pozuntunun qarşısını alır. "Odur ki, hesab edirəm ki, yol hərəkəti qaydalarının pozulması statistikasının və qəza vəziyyətlərinin azaldılması üçün belə sistemlərdən istifadə təşviq edilməlidir", - o bildirib.

İ.Əliyev ümid edir ki, yol polisi ayrı-ayrı polislərin bu cür savadsız əməllərinin qarşısının alınması məqsədilə düzgün nəticə çıxaracaq və yol hərəkəti qaydalarının pozulmasının qarşısının alınmasına kömək edən texniki vasitələrin istifadəsini təşviq edəcək.-0-