Açiq mənbələrdən foto.

Açiq mənbələrdən foto.

Bakı/01.06.20/Turan: Biz Turan İnformasiya Agentliyi ilə Əmək və Əhalinin Sosial Müdafiəsi Nazirliyinin (ƏƏSMN) yazışmaları mövzusuna iki səbəbdən yenidən qayıtmağa məcburuq. Bir halda nazirlik özünün gecikmiş rəsmi cavab məktubunda yalan məlumat təqdim edib, ikinci halda isə yenə də agentliyin növbəti informasiya sorğusuna qanunla müəyyən edilmiş müddətdə - 24 saatdan 7 günədək cavab verməyib.

Xatırladaq ki, 2020-ci il aprelin 29-da Turan İnformasiya Agentliyi Nazirlər Kabineti tərəfindən təsdiq edilmiş 7 aprel 2020-ci il tarixli Fəaliyyət Planının icrası ilə bağlı qanunvericiliyə uyğun olaraq ƏƏSMN-ə informasiya sorğusu (483 saylı) göndərib. Bu, elektron formada işsiz kimi qeydiyyatdan keçmiş şəxslərə aprel-may aylarında hər ay üçün yaşayış minimumu həcmində (190 manat) birdəfəlik müavinətin  ödənilməsini nəzərdə tutur.

Cavab daxil olmadı. Agentlik açıq şəkildə nazirliyi qanunun icrasına çağırmaq məcburiyyətində qaldı. Və o zaman ƏƏSMN cavab verdi. Bəzi məsələlər, o cümlədən vətəndaş İlqar Əliyevə yardım göstərilməsindən imtina edilməsinin səbəbləri barədə izahat verildi. 14 may tarixli cavab məktubunda bildirilirdi ki, imtina Kənd Təsərrüfatı Nazirliyinin informasiya bazasından alınan məlumat əsasında edilib. Məlumata görə, İ.Əliyevin adına torpaq payı var. Biz Kənd Təsərrüfatı Nazirliyinə sorğu göndərdik. Oradan şifahi olaraq bildirdilər ki, onlarda torpaq payları haqda məlumat bazası yoxdur. Və İqtisadiyyat Nazirliyinin Əmlak Məsələləri üzrə Dövlət Xidmətinə müraciət etməyi məsləhət gördülər. Kənd Təsərrüfatı Nazirliyi informasiya sorğusuna yazılı cavab verməyi vəd edib. Biz gözləyirik.

Mayın 14-də agentlik ƏƏSMN-ə sorğu göndərərək İmamverdi Rəhimov və Zülfiyyə Rəhimova cütlüyünə birdəfəlik yardım ödəməkdən imtina edilməsini əsaslandırmağı xahiş edib. Lakin cavab gəlməyib.

Biz dəfələrlə, lakin nəticəsiz olaraq ƏƏSMN-nin kommunikasiya və ictimai əlaqələr şöbəsi ilə (012) 5964961 nömrəli telefonla əlaqə saxlamağa cəhd etmişik.

Turan-ın informasiya sorğuları və ƏƏSMN-nin reaksiyası belə bir fikir yaradır ki, nazirlikdə qeyri-sağlam atmosfer yaranıb, yumşaq desək, yalan və vətəndaşların aldadılması qurumun cəmiyyətlə münasibətlərinin arsenalına daxil edilib.

Biz növbəti dəfə xatırladırıq ki, Əmək və Əhalinin Sosial Müdafiəsi Nazirliyi AR Konstitusiyasının 50-ci maddəsini və AR “KİV haqqında” qanununun ən gec 24 saat ərzində informasiya vermək öhdəliyi müəyyən edən 8-ci maddəsini, AR “İnformasiya əldə etmək haqqında” qanununun informasiya sorğusunun cavabdeh tərəfindən ən qısa müddətdə, lakin 7 iş günündən gec olmayaraq icra edilməsini nəzərdə tutan 24.1-ci maddəsini kobud şəkildə pozub. Qanunla nəzərdə tutulmuş məlumatların verilməsindən imtina AR “Korrupsiyaya qarşı mübarizə haqqında” qanunun 9.3.8-ci maddəsinə uyğun olaraq korrupsiya ilə bağlı qanun pozuntusu kimi nəzərdən keçirilir.

Biz Turan agentliyinin 29 aprel və 14 may 2020-ci il tarixli informasiya sorğuları ilə əlaqədar ƏƏSMN tərəfindən açıqlama gözləyirik. Əsasən niyə nazirlik Kənd Təsərrüfatı Nazirliyinin mövcud olmayan məlumat bazasına istinad edib və niyə 14 may tarixli informasiya sorğusuna cavab vermir?—0—

 

Rəy yaz

Cəmiyyət

Taksi sayı azaldılır, bəs köhnə taksiçilər nə ilə dolanacaqlar? – Rauf Ağamirzəyev Çətin sualda



Bizi sosial şəbəkələrdə izləyin

Xəbər lenti