Yüzlərlə Azərbaycan vətəndaşı Türkiyədən qayıda bilmir

Bakı/08.07.20/Turan: Türkiyə-Azərbaycan sərhədində toplaşan yüzlərlə Azərbaycan vətəndaşı aylarla ölkəyə qayıda bilmir. 

Bu barədə Turana vətəndaşların özləti məlumat verdilər. Adların çəkilməsini istəməyən vətəndaşlar bildirib ki, artıq dördüncü aydır Türkiyənin Qars və Iqdır şəhərlərində Azərbaycana keçmək üçün icazə gözləyirlər. "Burada yüzlərlə adam gözləyir. Onların arasında hamilə qadınlar, uşaqlar, yaşlı və xədtə insanlar da var. Bütün bu insanlar Türkiyənin müxtəlif şəhərlərindən gəlib sərhəddə toplaşıblar. Naxçıvana keçmək istəyirik, amma bizi buraxmırlar". 

Vətəndaşlar vurğulayıb ki, Türkiyəyə işsizlik ucbatından üz tutublar. "Azərbaycanda iş tapa bilmirdik, Türkiyəyə işləməyə getmişik. Mart ayında isə koronavirusa görə karantin elan edildi, çoxumuz işimizi itirdik, kirayə pulunu verə bilmirdik deyə qərara gəldik ki, Azərbaycana qayıdaq. Bizi isə ölkəyə buraxmırlar. Yığdığımız pul da bitmək üzrədir". 

Sərhəddə qalan vətəndaşlar qeyd edir ki, onlara yardım göstərilmir. "Burada kimisi yataqxanada, kimisi parkda yatır. Heç bir yardım yoxdur. Hələ İstanbulda olanda, martın 25-də Azərbaycan səfirliyinə müraciət etmişik. Orada bizi guya qeydiyyata aldılar. Dəfələrlə telefonla əlaqə saxladıq, amma xeyri olmadı. Qars şəhərindəki Azərbaycan konsulluğuna getdik, qəbul etmədilər. Iqdır şəhərində isə qəbul etsələr də, bizə öz pulumuzla AZAL-dan bilet almağa məsləhət gördülər. Bu ucuz qiymətə uçuşlar isə avqustun 7-dən başlayır. Bizə deyirlər gözləyin. "Necə gözləyək?" suala isə "bizə aidiyyatı yoxdur" cavab verirlər. Bizimlə heç kəs maraqlanmır, buraxıblar Allahın ümidinə". 

Məsələ ilə bağlı Xarici İşlər Nazirliyindən münasibət öyrənmək mümkün olmasa da, qurumun mətbuat xidmətinin rəhbəri Leyla Abdullayeva iyulun əvvəlində Turana bildirmişdi ki, Türkiyə timsalında xüsusi reyslər açılıb və Türkiyədən Azərbaycana qayıtmaq istəyən vətəndaşlar bu reyslərdən istifadə edə bilərlər. "İyulun 1-dən etibarən həm AZAL, həm Türkiyə Hava Yolları vasitəsilə həftədə dörd dəfə uçuşlar həyata keçiriləcək". 

Nazirlər Kabinetinin mətbuat xidmətinin rəhbəri İbrahim Məmmədov isə jurnalistlərə bildirmişdi ki, Rusiya və Türkiyədə olan Azərbaycan vətəndaşların ölkəyə gətirilməsi təmin olunacaq. "Vətəndaşların Türkiyə və Rusiyadan Azərbaycana gətirilməsi texniki imkanlarla bağlıdır. Karantin zonalarında yerlər boşaldıqca, xaricdən vətəndaşlar gətirilərək karantinə yerləşdiriləcək".