7 şəhid, 10 yaralı. Müharibə bitməyib? – Zərdüşt Əlizadə “Çətin sual" qarşısında

Bakı/17.11.21/Turan: Azərbaycan Müdafiə Nazirliyinin məlumatına görə, noyabrın 16-da dövlət sərhəddində Ermənistanın təxribatları nəticəsində baş verən döyüş əməliyyatları zamanı Azərbaycan Ordusunun 7 hərbi qulluqçusu şəhid olub. Daha 10 nəfər yaralanıb. Azərbaycan - Ermənistan sərhədində vəziyyət noyabrın 16-ı axşamdan sabitləşib, məlumatda belə deyilir.

Ermənistan-Azərbaycan sərhədində hərbi əməliyyatlar dünən axşamdan Rusiya tərəfinin vasitəçiliyi ilə dayandırılıb. Azərbaycan Müdafiə Nazirliyi bildirib ki , Rusiya Federasiyasının müdafiə naziri Sergey Şoyqu  Azərbaycanın müdafiə naziri Zakir Həsənova zəng edib və onunla hərbi əməliyyatların dayandırılması imkanlarını müzakirə edib. Türkiyənin müdafiə naziri Hulusi Akar da Z.Həsənova zəng edərək Azərbaycana tam dəstəyini ifadə edib. ABŞ dövlət katibi Antoni Blinken verdiyi bəyanatda bildirib ki,  Ermənistan və Azərbaycan arasında intensiv döyüşlərin getdiyi barədə məlumatlardan “dərin narahatdır”.

"Biz hər iki tərəfi gərginliyi azaltmaq və daha da eskalasiyaya yol verməmək üçün dərhal konkret addımlar atmağa çağırırıq. Biz həmçinin tərəfləri sərhədlərin demarkasiyası da daxil olmaqla bütün həll edilməmiş məsələlərin həlli üçün birbaşa və konstruktiv şəkildə məşğul olmağa çağırırıq", - bəyanatda deyilir.

İki ölkə sərhəddində baş verən bu dəfəki gərginliyin səbəbi nə idi? Müharibə bitibsə, niyə yenidən gərginlik yaşanır, itki verilir?

Siyasi şərhçi Zərdüşt Əlizadə  Kamran Mahmudovun təqdimatında yayımlanan “Çətin sual” verilişində bu və digər suallara cavab verir.