Eks-nazir Tofiq Zülfüqarov: Bu, Rusiyaya yarınmaq cəhdidir

Bakı/29.03.21/Turan: Qarabağda məskunlaşan ermənilərin qondarma rejiminin bu günlərdə rus dilinə “ikinci rəsmi dil” statusu verməsi Rusiyaya yarınmaq cəhdidir. Keçmiş xarici işlər naziri Tofiq Zülfüqarov bunu Turan-ın “Çətin Sual” proqramının 2021-ci il martın 29-da “Qondarma rejimin rus dili sevgisi” mövzusuna dair buraxılışında bildirib.

Eks-nazir bildirir ki, belə cəhdlər, bu yöndə atılan addımlar ermənilərin nəzərdə tutduğu nəticəni verməyəcək. O vurğulayır ki, faktiki olaraq Ermənistanda rus dilində məktəblər bağlanıb, odur ki, Qarabağda ermənilərin bu addımı daha çox özlərinin hansısa məqsədlərinə xidmət edir.

Amma keçmiş nazir hesab edir ki, Azərbaycan işğaldan azad edilmiş ərazilərdə varlığını gücləndirməli, əhalinin bölgəyə sürətlə qayıtması, təhlükəsizlik, bu ərazilərdə manatın dövriyyəyə buraxılması. Azərbaycan qanunvericiliyinin tətbiqi kimi istiqamətlərdə ərazinin Azərbaycana reinteqrasiyası sürətlənməlidir. 

Keçmiş nazir istisna etmir ki, Qarabağdakı ermənilər ikili vətəndaş almaq, rus rublundan istifadə və s. kimi məsələlərə əl ata bilərlər: “Amma get-gedə anlayacaqlar ki, Qarabağda gələcəkləri yoxdur. Odur ki, separatçılıq fəaliyyəti azalacaq. Ya Azərbaycan vətəndaşı kimi yaşamağa razılaşacaqlar, ya da bölgədən xaricə immiqrasiya edəcəklər”, deyə keçmiş nazir bildirir.

Onun fikrincə, ermənilərin Qarabağda hər hansı dövlət qurumu yaratmaq cəhdləri də baş tutan deyil, dünya Qarabağı Azərbaycanın tərkib hissəsi bilir, bunun əksini deyən yoxdur.

Keçmiş nazir əlavə edir ki, ortada Türkiyə amili var və bu amil də ciddi əhəmiyyətə malikdir, üstəlik, bu amil Rusiyanın Azərbaycana qarşı ehtimal olunan hər hansı addımını neytrllaşdırmağa yetərli olacaq. Digər tərfdən isə Rusiyanın öz daxili problemləri artır, iqtisadi sanksiyalar onu zəiflədir, odur ki, Qarabağda separatçılığa meydan verə bilməyəcək.

Eks-nazir deyir ki, Rusiya Cənubi Osetiyada, Abxaziyada, Krımdakı ssenariləri Qarabağda tətbiq edə bilməyəcək, tərəflər arasında bəzi razılaşmaların pozulması mümkün deyil. O vurğulayır ki, Rusiya sülhməramlılarının bölgədə varlığı heç də Azrbaycanın suveren hüquqlarının məhdudlaşdırılması demək deyil.

Tofiq Zülfüqarov hesab edir ki, Azərbaycan işğaldan azad edilmiş ərazilərdə əhalinin məskunlaşması işini sürətlə həyata keçirsə ilin sonuna ermənilərin heç indiki yarısı da Qarabağda qalmayacaq. -05B-