Ermənistan- Azərbaycan arasındakı danışıqlar. Kimlər iştirak edib, kimlər edəcək? – Əhməd Əlili “Çətin sual" qarşısında

Bakı/08.10.21/Turan: Sentyabrın 30-da Gürcüstanın Kaxetiya bölgəsində Azərbaycan, Ermənistan və Gürcüstan ekspertlərinin ikigünlük işgüzar görüşü baş tutub.  Görüşdə Cənubi Qafqazda etimadın möhkəmləndirilməsi və sülhün bərqərar edilməsi tədbirləri müzakirə edilib.

Bunun ardınca isə Vyanada Azərbaycan və Ermənistan nümayəndələrinin görüşü olub. Görüşdə siyasi partiyaların üzvləri və deputatlar iştirak ediblər. Görüş Avstriya hakimiyyəti və ekspert cameəsi tərəfindən təşkil edilib. Görüşdə müharibədən sonrakı dövrdə nizamlanma məsələləri müzakirə olunub. Görüşdə Ermənistanın Respublika Partiyasından Armen Aşotyan və Karen Avakyan, Maarifçi Ermənistan Partiyasından Edmon Marukyan iştirak ediblər. Azərbaycandan isə Dağlıq Qarabağ Bölgəsinin azərbaycanlı icmasının rəhbəri, deputat Tural Gəncəliyev və REAL partiyasından olan deputat Erkin Qədirli iştirak ediblər.

Bir müddət öncə Nyu-Yorkda iki dövlətin xarici işlər nazirlərinin görüşü baş tutub. Azərbaycanın Xarici İşlər Nazirliyinin (XİN) Mətbuat xidməti idarəsinin rəisi Leyla Abdullayeva Azərbaycan və Ermənistan xarici işlər nazirlərinin növbəti görüşü barədə sualı cavablandırarkən deyib ki, gələcəkdə də belə bir görüşün keçirilməsini istisna olunmur.

Son günlər Azərbaycan Prezidenti İlham Əliyev və Ermənistan Baş naziri Nikol Paşinyan bir-birinə aralarında baş tuta biləcək mümkün görüş barədə, ictimai şəkildə mesajlar göndərir.

Ötən həftə Azərbaycan və Ermənistan liderləri ATƏT-in Minsk qrupunun təşkilatçılığı ilə görüşə razı olduqlarını bildiriblər.İlham Əliyev oktyabrın 2-də İspaniyanın EFE agentliyinə müsahibəsində deyib ki, "cənab Paşinyanla, o hazır olanda istənilən zaman danışmağa hazırdır".Onun sözlərinə görə, bu, müharibənin bitdiyinin və həmin "səhifənin çevrildiyinin yaxşı göstəricisi" ola bilər.Ermənistanın Baş naziri Nikol Paşinyan da azərbaycanlı həmkarı ilə görüşə hazır olduğunu bildirib.

Baş verənləri iki ölkə arasında danışıqların başlamasının ilkin siqnalları hesab etmək olarmı?

Siyasi şərhçi Əhməd Əlili  Kamran Mahmudovun təqdimatında yayımlanan “Çətin sual” verilişində bu və digər suallara cavab verir.--0--