Həbsdən azad olunan Abid Qafarovu indi işdən çıxarmaqla cəzalandırırlar? – Abid Qafarovun özü Çətin sualda

Bakı/09.06.23/Turan: İctimai fəal Abid Qafarov BP neft şirkətində işdən çıxarılıb.

O, Turan-ın müxbirilə söhbətində qeyd edib ki, barəsində qüvvəyə minmiş məhkəmə qərarı olduğuna görə Əmək Məcəlləsinin 74-ci maddəsinin 1-ci bəndinin Ç hissəsinə əsasən ötən il dekabrın 6-da onunla əmək müqaviləsinə xitam veriblər. Qafarov həbsdən azad edildikdən sonra yenidən BP şirkətinə iş üçün müraciət etməsinə baxmayaraq,  yenidən işə qəbul etməyiblər.

O, neft sahəsində istehsal- texnoloji proseslərin avtomatlaşdırılması üzrə mütəxəssisdir. 30 ilə yaxın Azərbaycanın neft-qaz və energetika sahəsində çalışıb.

Xatırladaq ki, Abid Qafarov ötən il iyulun 13-də həbs edilib. Onu bir qrup Qarabağ müharibəsi veteranı məhkəməyə verib. Onlar bildiriblər ki, Qafarov onları təhqir etib və böhtan atıb.

Məhkəmənin qərarı ilə Qafarov Cinayət Məcəlləsinin 147-ci (böhtan) və 148-ci (təhqir) maddələrilə bir il müddətinə azadlıqdan məhrum edilib. Hər ittiham üzrə 6 ay həbs cəzası alıb.

Abid Qafarovun təqib edilməsinin əsl səbəbi 2017-ci ildə qalmaqallı "Tərtər işi" üzrə guya Ermənistanın xeyrinə casusluqda ittiham olunan bir qrup hərbçiyə qarşı cinayətləri ifşa edən videoreportajlardır.

O, öz araşdırmalarını KİM.TV Youtube kanalında yayımlayıb.

İyunun 1-də Apellyasiya Məhkəməsi onun cəzasını yüngülləşdirərək vaxtından əvvəl azad edib.

Abid Qafarov həbs olunması, həbsdə yaşadıqları, işdən çıxarılması barədə Kamran Mahmudovun təqdimatında yayımlanan “Çətin sual” verilişində danışır.