Məhkəmələr insan haqlarına qarşı? – Samir Kazımlı “Çətin sual" qarşısında

Bakı/15.11.21/Turan:  Bu gün Bakı Ağır Cinayətlər məhkəməsində AXCP fəalı Aqil Hümbətovla bağlı qərar elan olunub. Aqil Hümbətov 10 il azadlıqdan mərhumetmə cəzası verilib. Hümbətova qarşı Cinayət Məcəlləsinin 126.2.4-ci maddəsi ilə (ümumi təhlükəli üsulla, xuliqanlıq niyyətilə qəsdən sağlamlığa ağır zərər vurma) cinayət işi açılmışdı. AXCP onun saxlanılmasına sosial şəbəkələrdə prezident İlham Əliyevə müraciətinin səbəb olduğunu bildirib.

Bu gün həmçinin Bakı Apelyasiya Məhkəməsində Tofiq Yaqublunun  Gürcüstanda anasının qəbrini ziyarət etməsi və mərasimə qatılması üçün ölkə sərhədlərin buraxılmasına dair verdiyi apelyasiya şikayətinə baxılıb. Məhkəmə hesab edib ki, Tofiq Yaqublu anasının yas mərasimində iştirak edə bilməz və onun anasının qəbrini ziyarət etmək hüququ yoxdur.

Gədəbəy Rayon İcra Hakimiyyətinin keçmiş başçısı, həbsdə olan Saleh Rüstəmli 10 gündür ki, aclıq edir. Rüstəmovun aclıq aksiyasına başlamasına səbəb icrasına başlanılan amnistiya aktına düşməməsi, qanunsuz olaraq üç ilədək həbsdə saxlanılması və ailəsinin mülkünün müsadirə edilməsidir. Müdafiə Xətti hüquq- müdafiə təşkilatı Saleh Rüstəmovun azadlığa buraxılması xahişilə ölkə prezidentinə müraciət edib. Saleh Rüstəmov Bakı Ağır Cinayətlər Məhkəməsinin hökmü ilə 7 il 3 ay müddətinə azadlıqdan məhrum olunub.

Noyabrın 12-də Bakı Apelyasiya Məhkəməsi hakim Habil Məmmədovun sədrliyi ilə Azərbaycan Xalq Cəbhəsi Partiyasının Binəqədi Rayon Şöbəsinin fəalı Ramiz Cəfərov barədə Sabunçu rayon Məhkəməsinin inzibati həbs qərarından verilən şikayətinə baxılıb. Onun barəsində  İnzibati Xətalar Məcəlləsinin 510 (xırda xuliqanlıq) və 535.1- ci (polisin qanuni tələbinə tabe olmama) maddələri ilə protokol tərtib edilib və Sabunçu rayon Məhkəməsinin qərarı ilə barəsində 25 sutkalıq inzibati həbs qərarı verilib. Bakı Apelyasiya Məhkəməsi Sabunçu rayon Məhkəməsinin qərarını qüvvədə saxlayıb.

Bütün baş verənlər barəsində hüquq müdafiəçisi Samir Kazımlı  Kamran Mahmudovun təqdimatında yayımlanan “Çətin sual” verilişində danışacaq.