Polis qadın qatillərinə dəstək verir? – Nərmin Şahmarzadə “Çətin sual" qarşısında

Bakı/05.08.21/Turan: Avqustun 4-də bir qrup feminist fəal Bakı şəhəri Xəzər rayon Polis İdarəsinin binası qarşısında “Sevincin qatili dövlətdir!” şüarı ilə aksiya keçirib. Aksiyaçılar polis idarəsinin binasının giriş qapısına qan rəngi rəmzi olan qırmızı rəngli maye atıblar. Aksiyaya səbəb bir neçə gün əvvəl əri tərəfindən qətlə yetirildiyi deyilən yerli sakin Sevinc Məhərrəmovanın dəfələrlə polis idarəsinə etdiyi müraciətlərlə bağlı heç bir tədbir görülməməsi olub.

Feminist fəallar polis idarəsinin qarşısında “Qadın qatilləri dövlətdir”, “Qadın qətlləri siyasidir” şüarları səsləndiriblər. Daha sonra bir neçə fəal saxlanılıb. Onlar Xəzər rayon Polis İdarəsinin binasında polislər tərəfindən fiziki, mənəvi təzyiqlərə və təhqirlərə məruz qaldıqlarını bildiriblər.

Daxili İşlər Nazirliyinin Mətbuat xidmətinin KİV və İctimaiyyətlə əlaqələr şöbəsinin rəisi Elşad Hacıyev bildirib ki, aksiya zamanı saxlanılan olmayıb, jurnalistlərə və aksiya iştirakçılarına fiziki təzyiqin olması barədə iddialar isə əsassızdır.

Qeyd edək ki bir neçə gün əvvəl vətəndaş Sevinc Məhərrəmova həyat yoldaşı tərəfindən qətlə yetirilib. O, bu ilin mart ayında həyat yoldaşı Füzuli Qarayev tərəfinfən zorakılığa məruz qaldığını bildirərək hüquq-mühafizə orqanlarına müraciət etmişdi. Cütlüyün 3 və 4 yaşlarında iki oğlu var.

Baş verənlərlər bağlı feminist fəal Nərmin Şahmarzadə Kamran Mahmudovun təqdimatında yayımlanan “Çətin sual” verilişində danışdı.