QHT-lər qayıdır?

Bakı/10.08.21/Turan: Hüquq Müdafiə Təşkilatlarının Monitorinq Qrupunun üzvləri Novella Cəfəroğlu, Səidə Qocamanlı və Səadət Bənənyarlı avqustun 4-də Azərbaycan prezidentinin köməkçisi Hikmət Hacıyevlə keçirdikləri görüşü müsbət qiymətləndiriblər.

Hüquq müdafiəçisi Novella Cəfəroğlu KİV-ə bildirib ki, görüşdə QHT sektorundakı problemlər müzakirə olunub. QHT-lər və donorlarla bağlı məsələlərin həll ediləcəyi vəd edilib.

Hüquq müdafiəçiləri həmçinin siyasi məhbus kimi tanıdıqları 38 nəfərdən ibarət siyahını prezidentin köməkçisinə təqdim ediblər. Hikmət Hacıyev bildirib ki, bu istiqamətdə addımlar atılacaq.

Həqiqətən də ictimai QHT-lər və siyasi məhbuslar problemi yaxın gələcəkdə həll ediləcək? “Çətin sual” verilişində Bakı İnsan Haqları Klubunun rəhbəri Rəsul Cəfərov bu və digər sualları cavablandırıb.

O, ictimai təşkilatlar və siyasi məhbuslar probleminin həlli mümkünlüyü ilə bağlı təxmin irəli sürməkdən imtina edib. Onun sözlərinə görə, Azərbaycanda vətəndaş cəmiyyəti ilə bağlı siyasət 2014-cü ildə sərtləşib, 2015-ci ildə isə QHT-lərə təzyiq daha da güclənib.

Cəfərov qeyd edib ki, mövcud qanunvericilik QHT-lərin fəaliyyətini çətinləşdirir. Həm də çətinliklər elə qeydiyyat zamanı başlayır. Eyni zamanda, onların maliyyələşdirilməsi problemləri də qarşısıalınmaz kimi görünür.

“Aydındır ki, bu şəraitdə vətəndaş cəmiyyəti institutları vahid orqanizm kimi fəaliyyət göstərə bilməz, hələ onların inkişafından danışmıram. 8 ildir ki, Azərbaycanda vətəndaş cəmiyyəti inkişaf etmir. Bu problemlər həll edilməlidir, belə ki, cəmiyyət, elə dövlət özü də qarşısında duran vəzifələrin, xüsusən 44 günlük müharibədən sonra yaranmış vəzifələrin həllinə ehtiyac duyur. QHT-lərin fəaliyyətini nizamlayan qanunvericilik optimallaşdırılmalıdır”, deyə o bildirib.

Cəfərov hökumətin bu məsələlərin həllinə hazır olub-olmadığından əmin deyil. “Bununla bağlı hər hansı məlumata malik deyilik. Hüquq müdafiə təşkilatlarının monitorinq qrupunun üzvləri Novella Cəfəroğlu, Səidə Qocamanlı və Səadət Bənənyarlının Azərbaycan prezidentinin köməkçisi Hikmət Hacıyevlə görüşünü müsbət mesaj hesab etmək olarmı? Bunu demək çətindir”, deyə o bildirib.

Cəfərovun sözlərinə görə, Hikmət Hacıyevin hüquq müdafiəçiləri ilə görüşündən bir neçə gün sonra QHT-lərə Dövlət Dəstəyi Agentliyi QHT-lərin qanunvericilik bazasının təkmilləşdirilməsi üzrə təkliflər paketi hazırlandığı və müvafiq qurumlara göndəriləcəyi barədə məlumat yayıb.

“Kim bilir, bəlkə də bu, gələcək irəliləyişlərin əlamətidir? Belədirsə, çox yaxşı. Amma bizdə başqa məlumat yoxdur. İndiyədək dəfələrlə siyasi məhbus məsələsinin həll ediləcəyi haqqında mesajlar olub. Amma bu, baş verməyib. Doğrudur, ölkədə siyasi məhbusların sayı azalıb, amma hələ də siyasi məhbuslar var və onlar az deyil. Bizim siyahımızda 50-yə yaxın siyasi məhbus var”, deyə o qeyd edib. -0-