Qonşu qonşu olsa... Azərbaycan qonşuları (Ermənistan, İran) ilə problemlərini həll edə biləcəkmi? - Zərdüşt Əlizadə Çətin sualda

Bakı/07.06.23/Turan: İyunun 12-də Vaşinqtonda Azərbaycan və Ermənistan xarici işlər nazirlərinin görüşü olacaq.  İyulun 21-də isə Brüsseldə Azərbaycan prezidenti İlham Əliyev və Ermənistanın baş naziri Nikol Paşinyan arasında görüşün planlaşdırıldığı xəbər verilib.

İlham Əliyev mayın sonunda Moskvada keçirilən üçtərəfli görüşdə demişdi ki, Bakı və Yerevanın bir-birinin ərazi bütövlüyünü tanımasından sonra tərəflər arasında bütün başqa məsələlərin həlli xeyli asanlaşacaq.

Ermənistan Təhlükəsizlik Şurasının katibi Armen Qriqoryan iyunun 5-də demişdi ki, tərəflər arasında sülh müqaviləsi artıq bu ilin sonunadək imzalana bilər. Lakin Ararat Mirzoyan iyunun 5-də parlamentdəki çıxışında demişdi ki, ərazi bütövlüyünün rəqəmlərlə göstəricisi gələcək sülh müqaviləsində olmayacaq:

“Ermənistan ərazisinin 29,8 min, Azərbaycan ərazisinin isə 86,6 min kvadrat kilometr olmasına dair bəyanatlar siyasi bəyanatlardır. Söhbət ondan gedir ki, bu iki sosialist respublikası Sovet İttifaqının tərkibində olarkən mövcud olmuş sərhədlər daxilində Ermənistanın Azərbaycana və Azərbaycanın Ermənistana ərazi iddiaları yoxdur”.

Ermənistan xarici işlər naziri bunu da bildirib ki, Ermənistan və Azərbaycan arasında sərhəd delimitasiyası üçün hansı xəritədən istifadə olunacağına dair hələ ki, razılaşma yoxdur, amma Yerevan problemin 1975-ci ilin xəritəsi əsasında həll olunmasını istərdi. Azərbaycan və Ermənistan ərazisindəki anklavlar məsələsinə toxunan Mirzoyan deyib ki, sülh müqaviləsinin layihəsində anklavlar məsələsi yoxdur.

Azərbaycan Ermənistan sülh danışıqları, eləcə də Azərbaycan- İran münasibətlərində yaşanan son olaylar barədə siyasi şərhçi Zərdüşt Əlizadə Kamran Mahmudovun təqdimatında yayımlanan “Çətin sual” verilişində danışır.