Siyasi məhbus problemi və Saleh Rüstəmova azadlıq tələbi... – Nəsimi Məmmədli “Çətin sual" qarşısında

Bakı/22.11.21/Turan: Bir qrup ictimai xadim Mövqe sənədi yayaraq, Qarabağ müharibəsi qazisi Saleh Rüstəmovu azad etməyə, siyasi məhbuslar problemini həl etməyə və ədalətsiz məhkəmə hökmlərinə son qoymaq üçün məhkəmə islahatını aparmağa çağırış edib. Sənəddə deyilir:

“Biz, sivil toplum nümayəndələri, 2018-ci il mayın 8-də tutulan, Bakı Ağır Cinayətlər Məhkəməsinin hökmü ilə 7 il 3 ay müddətinə azadlıqdan məhrum edilən Gədəbəy rayonunun keçmiş icra başçısı, Qarabağ müharibəsi qazisi Saleh Rüstəmovun 17 gündür ki, aclıq aksiyası keçirməsindən, onun sağlamlıq durumundan narahatıq. Vəkillərinin və əzizlərinin bildirdiyinə görə, Saleh Rüstəmovun aclıq aksiyası keçirməsi artıq onun sağlamlıq durumu ilə bağlı ağır fəsadlar yaradıb, onun həyatına real təhlükələr yaranıb.”

Azərbaycanın müstəqillik qazanmasından bu günə qədər ölkə parlamenti tərəfindən 11 Aministiya Aktı qəbul edildiyini, ölkə başçısı tərəfindən 67 Əfv sərəncamının imzalandığını xatırladan ictimai nümayəndələr  sənəddə qeyd edirlər ki, bunlar ümumilikdə yüz minə yaxın məhkumun azadlığa çıxmasına və ya onların cəzalarının yüngülləşdirilməsinə gətirib çıxarsa da, məhkumların bir çoxu barəsində ədalətsiz məhkəmə qərarlarının nəticəsini aradan qaldırsa da, təəssüflər olsun ki, bu, ümumi olaraq, ədalətin qələbəsi anlamına gəlmir.

Sənəddə yazılanlar barədə sənədin təşəbbüskarlarından biri, siyasi şərhçi Nəsimi Məmmədli Kamran Mahmudovun təqdimatında yayımlanan “Çətin sual” verilişində danışır.