“Tərtər işi”nə görə general həbsi. Növbə daha yuxarılara nə vaxt çatacaq? – Sahib Kərimli “Çətin sual” qarşısında
Bakı/06.09.22/Turan: Baş Prokurorluğun yaydığı məlumata görə, “Tərtər işi” üzrə Müdafiə Nazirliyinin Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin rəisi vəzifəsini icra edən general-mayor Bəkir Orucovla yanaşı, daha bir neçə nəfər həbs olunub. Onların arasında Ramil Əhmədov, Rahib Məmmədov da var. Beləliklə, 2021-ci ilin dekabrında “Tərtər işi” üzrə istintaq yenilənəndən sonra işgəncələrə görə cinayət məsuliyyətinə cəlb olunanların sayı 17 nəfərə çatıb. Onlardan 12 nəfər barəsində həbs qətimkan tədbiri seçilib. Bir nəfər hazırda axtarışdadır. Daha dörd nəfər isə icraat yenilənməmişdən öncə həbsdə idi. Sadəcə, icraat yenilənəndən sonra başqa şəxslərə qarşı işgəncələrdə də iştiraklarıyla bağlı məlumatlar üzə çıxdığına görə onlara yenidən ittiham verilib.
Ötən müddətdə işgəncəyə məruz qalmış 288 yeni zərərçəkmiş müəyyənləşdirilərək dindirilib, ekspertizadan keçirilib. Əvvəlki dövrdəki zərərçəkmişlər də nəzərə alınaraq, hazırda ümumilikdə 405 nəfər zərərçəkmiş qismində tanınıb.
İcraat yenilənəndən sonra zərərçəkmiş qismində tanınanlar arasında mərhum leytenant Təmkin Nizamioğlu da var. 2017-ci ildə onun ağciyər xəstəliyindən ölməsi barədə rəy verilsə də, istintaq onun işgəncə nəticəsində həyatını itirməsi qənaətinə gəlib. Onun meyiti ekskumasiya edilib, məhkəmə-tibbi ekspertizasının rəyi də onun işgəncə nəticəsində öldüyünü təsdiqləyib. Onun atası zərərçəkmiş şəxsin hüquqi varisi qismində tanınıb.
Tərtər hadisələri zamanı dövlətə xəyanət və başqa ittihamlarla həbs edilən, lakin son nəticədə dövlətə xəyanət yox, hərbi sahəyə aid başqa ittihamlarla məhkum edilən 26 nəfərin işi üzrə araşdırma aparılıb. Onlardan 19 nəfər barəsində cinayət təqibinə bəraətverici əsaslarla xitam verilib. Daha 7 nəfərə isə ittihamların bir qismi üzrə bəraət verilib, bəzi epizodlar üzrə isə bəraətverici olmayan əsaslar olsa da, onların da haqqındakı cinayət təqibinə xitam verilib.
Dövlətə xəyanətdə təqsirləndirilərək uzunmüddətli həbs cəzasına məhkum edilmiş 19 nəfərin barəsindəki məhkəmə hökmlərilə bağlı da qərar qəbul edilib. Baş prokuror onların barəsindəki məhkəmə qərarlarına yenidən baxılması üçün Ali Məhkəməsinin Plenumuna müraciət edib.
Baş Prokurorluğun “Tərtər işi”nin gedişatı ilə bağlı məlumatı və generalın həbsi barədə prosesi gündəmdə saxlayan siyasətçi Sahib Kərimli Kamran Mahmudovun təqdimatında yayımlanan “Çətin sual” verilişində danışır.
Youtube səhifəsinin ünvanı:
https://www.youtube.com/c/TuranAgentliyi
Facebook səhifəsinin ünvanı:
Çətin sual
-
Seçkilərin Monitorinqi və Demokratiyanın Tədrisi (SMDT) Mərkəzinin rəhbəri Anar Məmmədliyə qarşı Azərbaycan CM-in 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb.
-
Gürcüstanda Tbilisinin mərkəzində, parlament binası qarşısında xarici agentlər haqqında qanuna qarşı irimiqyaslı etiraz aksiyaları davam edir.
-
Aprelin 25-də Avropa Parlamenti ölkədəki vətəndaş cəmiyyətinə qarşı repressiyalara görə Azərbaycan hakimiyyətini qınayan qətnamə qəbul edib. Qətnamə 474 “lehinə”, 4 “əleyhinə” və 51 “bitərəf” səslə qəbul edib. Avropa Parlamentinin deputatları Azərbaycan hakimiyyətini 2023-cü ilin dekabrında həbs edilmiş hüquq müdafiəçisi İlhamiz Quliyevi, Avropa İttifaqı və digər ölkələrin vətəndaşları da daxil olmaqla, bütün digər siyasi məhbusları dərhal və qeyd-şərtsiz azad etməyə çağırıblar.
-
Ölkə başçısı İlham Əliyev aprelin 23-də ADA Universitetində təşkil olunan “COP29 və Azərbaycan üçün Yaşıl Baxış” mövzusunda beynəlxalq forumda çıxışında quru sərhədlərin bağlı qalmasını təhlükəsizliklə əlaqələndirib. Prezident deyib ki, quru sərhədlərin müəyyən dövrdə bağlı qalmasından sonra Azərbaycanda təhlükəsizliyin gücləndiyini görürlər.
Rəy yaz