Tofiq Zülfüqarov: �Rusiyanın hər iki tərəflə dost olması mümkün deyil�

Bakı/28.12.18/Turan: Keçmiş xarici işlər naziri Tofiq Zülfüqarov Turan agentliyinin "Çətin sual" proqramına müsahibəsində 2018-ci ilin xarici siyasi yekunlarını şərh edib.

O 2018-ci ilin mühüm xarici siyasi hadisələri sırasında Xəzərin hüquqi statusu haqqında Konvensiyanın imzalanmasını göstərib. 20 ildən artıq davam edən danışıqlardan sonra sənəd imzalanıb.

"Təbii ki, bu, prosesin sonu deyil, yenə də müzakirələr davam etdiriləcək. Amma hansısa əsaslar artıq müəyyən olunub", - T.Zülfüqarov vurğulayıb.

İkinci mühüm hadisə kimi TANAP qaz kəmərinin işə salınmasını göstərib və bunu Azərbaycanın beynəlxalq nüfuzunu artıran mühüm transregional layihə hesab edib. Bu silsilədən Bakı-Tbilisi-Qars dəmir yolunun istismara verilməsini də qeyd edib.

Digər hadisələrdən çox vacib olan ABŞ-la Azərbaycan arasında əlaqələrin daha da intensiv olmasıdır

"Çox vacib məsələlərdən olan Azərbaycan-Rusiya əlaqələrinin güclənməsi və ikitərəfli dialoqun daha da intensiv şəkil almasıdır", - T.Zülfüqarov davam edib.

Azərbaycanın xarici siyasətinə çox təsir göstərən hadisə Ermənistanda hakimiyyətin dəyişməsi oldu. Bu, ümumiyyətlə, Cənubi Qafqazda geopolitik vəziyyətdə dəyişikliklərə ümidlər yaratdı.

Ümumiyyətlə, T.Zülfüqarovun qeyd etdiyi kimi, danışıqların nəticəsinin olacağına Azərbaycanda demək olar ki, heç kim inanmır. Amma Ermənistanda baş verən hadisələr geopolitik vəziyyətə, regionda olan güclərin balansına təsir göstərən çox vacib bir hadisədir.

Eyni zamanda ATƏT-in Minsk Qrupunun həmsədr ölkələri Rusiya və ABŞ arasında əlaqələrin kəskin olması və daha da kəskinləşməsi Ermənistan-Azərbaycan münaqişəsinin həllinə öz təsirini göstərəcək.

Azərbaycanın Qərbə inteqrasiyası məsələsinə gəlincə, keçmiş nazirin sözlərinə görə, Bakı Qərbə inteqrasiyasında tərəfdaşlıq üslubuna üstünlük verir.

"Niyə? Çünki Azərbaycan tərəfdaş olaraq həm Qərbdən nə isə götürmək istəyir, həm də Qərbə nə isə vermək iqtidarındadır. Bu baxımdan iqtisadi layihələr Qərblə əlaqələrin güclənməsi üçün böyük təməl qoyur. Bu layihələrin nəticəsində biz Avropaya daha yaxın oluruq və onlar bizi daha da yaxşı görür və qiymət verir", - diplomat bildirib.

Avropa İttifaqı ilə danışıqlar səviyyəsində olan əməkdaşlıq haqqında sazişin işlənməsi də çox vacibdir. O, yeni sazişin perspektivlərini optimist qiymətləndirib.

T.Zülfüqarov MDB ölkələri ilə əlaqələrin aktiv inkişafını qeyd edib. Rusiya ilə əlaqələrin ən əsas meyarı Qarabağ məsələsidir. "Hesab edirəm ki, Rusiyanın bu sahədə mövqeyi vacib olan bir məsələdir. İqtisadi, humanitar və digər sahələrdə məsələlər asanlıqla həll oluna bilər. Qarabağ məsələsinə gəlincə, Ermənistana təhlükəsizlik qarantiyası verməsi təbii ki, Azərbaycan üçün ən böyük problemdir. İndi baş verən hadisələrə baxanda optimizm üçün bir qədər əsaslar mövcuddur. Amma bu hadisələr necə inkişaf edəcək? O da sual altındadır. Amma onu da qeyd etmək lazımdır ki, gözləmə mərhələsi çox uzanıb. Yəni, Rusiyanın hər iki tərəflə dost olmağa çalışması mümkün olan deyil. Hər halda Azərbaycan tərəfindən gözləmə mövqeyi heç də uzun müddət davam edə bilməz", - T.Zülfüqarov bildirib.

2019-cu ildə ölkənin xarici siyasətinin əsas prioritetlərinə toxunan T.Zülfüqarov əsas prioritet kimi Ermənistan-Azərbaycan münaqişəsinin nizamlanmasını göstərib.

İkinci istiqamət Azərbaycanın dünyada, ən azı regionda iqtisadi və siyasi rolunun güclənməsidir. Üçüncü istiqamət Türkiyənin Azərbaycanla əməkdaşlığının güclənməsidir.

Dördüncü, Rusiya ilə olan problemlərin həll olunmasıdır. "İlk növbədə Qarabağ mövzusunu nəzərdə tuturam", -T.Zülfüqarov açıqlama verib.

Beşinci, Avropa İttifaqı ilə əlaqələrin güclənməsidir.

" Altıncı istiqamət ABŞ ilə əlaqələrin güclənməsidir. O da bəzi suallar doğurur. Əlaqələrin gücləndirilməsi üçün ikitərəfli istək olmalıdır. Hələlik ABŞ-ın regiona aid xarici siyasəti Azərbaycanda axıracan bəlli deyil. Əgər ABŞ administrasiyası əlaqələri gücləndirmək niyyətində olsa və konkret addımlar atsa bu istiqamət də çox vacib ola bilər", - T.Zülfüqarov yekunlaşdırıb.-06D--