"Anglo Asian Mining" Soyudl ilə bağlı ifadə olunan narahatlığı etiraf edir və Azərbaycan hökuməti ilə əməkdaşlığa hazırdır

Bakı/17.07.23/Turan: Azərbaycanda qızıl, mis və gümüş hasilatı üzrə ixtisaslaşan "Anglo Asian Mining" şirkəti Gədəbəy rayonunda ikinci tullantı anbarının tikintisi ilə bağlı planları haqqında yeni məlumat dərc edib. İyulun 14-də Azərbaycanın baş naziri Əli Əsədovun qərarı ilə şirkətin Söyüdlü qızıl mədənində fəaliyyəti müvəqqəti olaraq dayandırılıb. Hökumət beynəlxalq konsaltinq firmasına "Anglo Asian Mining"in fəaliyyətinin ətraf mühitə təsirinin qiymətləndirilməsini aparmağı xahiş edib.

İkinci tullantı anbarı ətrafında etirazlara cavab olaraq, "Anglo Asian Mining"  ifadə olunan narahatlıqları etiraf edir. Bu problemləri həll etmək üçün müxtəlif dövlət qurumları müstəqil laboratoriyaların dəstəyi ilə mövcud tullantı anbarının yaxınlığında ətraf mühitdən nümunə götürüblər. Nəticələr yerli əhali arasında hər hansı çirklənmə və ya xəstələnmənin artdığını göstərməyib.

"Anglo Asian Mining" 2009-cu ildən fəaliyyət göstərdiyi və sosial və iqtisadi inkişafa mühüm töhfə verdiyi Gədəbəy əhalisi ilə uzunmüddətli müsbət münasibətini vurğulayır. İkinci tullantı anbarının yeri ilə bağlı gözlənilməz narahatlıqlara baxmayaraq, şirkət layihənin texniki və ekoloji aspektlərini, o cümlədən təklif olunan sahəni yenidən qiymətləndirmək üçün hökumətlə işləməyə razılıq verib.

Ekoloji Tədqiqat Ekologiya və Təbii Sərvətlər Nazirliyi tərəfindən dəvət olunmuş müstəqil beynəlxalq konsaltinq şirkəti tərəfindən aparılacaq.  "Anglo Asian Mining"in yerli ətraf mühit mühəndisləri və tullantıların idarə olunması üzrə müstəqil məsləhətçilər bu prosesdə köməklik göstərəcəklər. Hazırda şirkət hökumətlə tədqiqat protokolunu yekunlaşdırır və bu müddət ərzində mövcud tullantı anbarına atqılarla nəticələnən bəzi əməliyyatları azaltmağı planlaşdırır. İstehsala rəhbərliyə müvafiq olaraq yenidən baxılacaq və protokolun təfərrüatları tamamlandıqdan sonra dərc olunacaq.

"Anglo Asian Mining" qeyd edir ki, o, yerli qanunlara və normativ aktlara riayət etməyə böyük əhəmiyyət verir və öz işçilərinin və yerli maraqlı tərəflərin sağlamlığı, təhlükəsizliyi və rifahı onun üçün prioritetdir. Şirkət dünyanın ən yaxşı təcrübələrinə, beynəlxalq standartlara və təlimatlara riayət edir, onun tullantı anbarlarının sənaye standartı hesab edilən ICMM standartlarına uyğun olmasını təmin edir. Lazımi icazələr alınana və ekoloji tədqiqatlar tamamlanana qədər hazırkı bəndin divarının ucaldılmasının məqsədəuyğunluğu ilə bağlı texniki təminatlar alınıb. Beləliklə, şirkət ikinci bənd tikiilən zaman onun kifayət qədər tullantı tutumuna malik olacağına inanır.

Şirkət ikinci tullantı saxlama anbarının yerləşdiyi ərazinin yenidən qiymətləndirilməsinin gedişatı və zəruri hallarda texniki aspektlər barədə mütəmadi olaraq yeniliklər təqdim etməyi öhdəsinə götürür.

Söyüdlü qızıl yatağı "RV Investments Group Services" MMC-nin sahibi, ABŞ vətəndaşı Reza Vəzirinin iştirakı ilə Böyük Britaniyada qeydiyyatdan keçmiş Anglo Asian Mining PLC şirkəti tərəfindən idarə olunur.

1997-ci ildə Azərbaycan hökuməti “RV Investments Group Services” MMC ilə bir sıra filiz yataqlarının, o cümlədən Söyüdlü kəndində işlənmə hüququnun verilməsi haqqında müqavilə imzalayıb.--0--