"Jurnalistlər evi"dəki qeyri-yaşayış sahələri hərraca çıxarılıb

Bakı/31.10.23/Turan: “Jurnalistlər evi” yaşayış binasının birinci mərtəbəsində yerləşən sahəsi 676 m2 olan qeyri-yaşayış sahələri məhkəmə icraçıları tərəfindən hərraca çıxarılıb. Yeri gəlmişkən, binanın inşaatçısı (“Protos” MMC) və KİV-ə Dövlət Dəstəyi Fondunun keçmiş icraçı direktoru Vüqar Səfərlidən müsadirə olunan obyekt jurnalistlərin “xəbər otağı” kimi istifadəsinə kifayət qədər faydalı olardı.

Hərrac  Əmlak Məsələləri Dövlət Xidməti tərəfindən aparılır və noyabrın 29-da keçiriləcək. Qeyri-yaşayış sahələri (ünvan: Bakı şəhəri, Yeni Salyan yolu) 2 milyon 427,3 min manat və ya 3 590 manat (2112 ABŞ dolları) dəyərində qiymətləndirilir.

Bu ilin aprelində Ali Məhkəmə qeyri-yaşayış sahələrinin keçmiş sahiblərinin dövlət xeyrinə müsadirədən azad edilməsi ilə bağlı cinayət işi üzrə kassasiya şikayətini təmin etməyib.

Jurnalistlər üçün ilk yaşayış binası 2010-2013-cü illərdə dövlət büdcəsi hesabına tikilib. Yaşayış binasının birinci mərtəbəsinin yuxarıda adıçəkilən hüquqi və fiziki şəxslərin mülkiyyətinə necə keçdiyi barədə ictimaiyyətə açıq məlumat yoxdur. 17 mərtəbəli binanın birinci mərtəbəsinin tikintisi üçün layihədə nəzərdə tutulan ilkin məqsəd də məlum deyil.

Hərracların təşkili ilə bağlı qüvvədə olan qaydalar hərraca çıxarılan daşınar və daşınmaz əmlakın əvvəlki dörd hərracda təklif olmadıqda, ilkin qiymətin 50%-i qiymətinə çəkic altında satılmasına icazə verir.

Qeyri-yaşayış sahələrinin jurnalistlərin və ya onların birliklərinin istifadəsinə verilməsi məsələsi müzakirə olunubmu - bunu yalnız təxmin etmək olar. Bir çox qəzet redaksiyaları, onlayn media və müstəqil jurnalistlər yaradıcılıq məkanı ilə bağlı ciddi çətinliklər yaşayırlar. Media nümayəndələrinin istifadəsinə verilən iki binada yüzlərlə ailə yaşayır. Birinci mərtəbə onların daimi ünsiyyəti və birgə işləmək məkanı ola bilərdi. --08B--