Moskva Bakıya iqtisadi canlanma təklif edir

Bakı/27.08.20/Turan: Moskvada rəsmi səfərdə olan Azərbaycanın xarici işlər naziri Ceyhun Bayramov və Rusiya Baş nazirinin müavini Aleksey Overçuk çərşənbə günü işgüzar görüş keçiriblər.

Bu barədə Rusiya hökumətinin saytında məlumat verilib.

Qeyd olunduğu kimi, tərəflər ikitərəfli qarşılıqlı ticarət-iqtisadi əlaqələr, mədəniyyət və təhsil sahələrində əməkdaşlıq məsələlərini müzakirə edib.

Aleksey Overçuk, Rusiya ilə Azərbaycanın münasibətlərinin bərabər dərəcədə etibar və qarşılıqlı fayda üzərində qurulduğu strateji tərəfdaşlar olduğunu vurğuladı.

“Rusiya Azərbaycanın aparıcı ticarət tərəfdaşlarından biridir. 2020-ci ilin yanvarından iyun ayına qədər ölkələrimiz arasında ticarət dövriyyəsi 1,368 milyard dollara çatıb. Azərbaycanda 900-dən çox ortaq şirkət var, o cümələn 100% Rusiya kapitalı ilə 200 şirkət var. Qarşılıqlı investisiyalar 6 milyard dollara çatıb. 2024-cü ilədək fəaliyyət planı uğurla icra olunur - bunlar ticarət, nəqliyyat infrastrukturu, elm tutumlu istehsal, iqtisadiyyatın və turizmin səmərəliliyinin artırılması sahələrində beş “yol xəritəsi” dir. İnnovativ inkişaf və rəqəmsal iqtisadiyyat sahəsindəki əməkdaşlığa dair altıncı "yol xəritəsi" nin layihəsi razılaşdırılıb və imzalanmağa hazırlığın yüksək səviyyəsindədir”, deyə Baş nazirin müavini bildirib.

Aleksey Overçuk Rusiya ilə Azərbaycan arasında nəqliyyat sahəsində normativ hüquqi bazanın inkişafı ilə bağlı birgə işi qeyd edib və rəqəmsal nəqliyyat sistemlərinin yaradılması və inkişafı sahəsində 2018-ci ildə imzalanmış Əməkdaşlıq Memorandumunun həyata keçirilməsi üçün fəaliyyətin fəallaşdırılmasını təklif edib.

Baş nazirin müavini, eyni zamanda, readmissiya haqqında Saziş layihəsi və Rusiya Federasiyası Hökuməti ilə Azərbaycan Respublikası Hökuməti arasında müvəqqəti əmək fəaliyyəti və Azərbaycan Respublikası ərazisində işləyən Rusiya Federasiyası vətəndaşlarının və Rusiya Federasiyasında çalışan Azərbaycan Respublikası vətəndaşlarının hüquqlarının qorunması haqqında Saziş layihəsi üzərində işlərin fəallaşdırılmasının zəruriliyindən danışıb.

"Qeyd olunan sənədlərin imzalanması, ilk növbədə, ölkələrimizin ərazisində vətəndaşlar tərəfindən əmək fəaliyyətinin həyata keçirilməsi üçün şəraitin keyfiyyətini yaxşılaşdırmaq məqsədi daşıyır", - deyə Aleksey Overçuk qeyd edib.

Görüş iştirakçıları Rusiya Federasiyası ilə Azərbaycan Respublikası arasında İqtisadi Əməkdaşlıq üzrə Hökumətlərarası Komissiyanın növbəti iclası, Rusiya və Azərbaycan Gənclər Təşəbbüsləri Forumu, Rusiya-Azərbaycan Regionlararası Forumu, Valday Beynəlxalq Müzakirə Klubunun Bakıdakı səyyar iclasının və Bakı Beynəlxalq Humanitar Forumu da daxil olmaqla əvvəllər planlaşdırılan bütün tədbirlərin keçirilməsinin vacibliyini qeyd etdilər.

2019-cu ilin yekunlarına əsasən, Azərbaycanla Rusiya arasında ticarət dövriyyəsi 3,022 milyard dollar təşkil edib, bu da son on ildə ən yüksək göstəricidir. Azərbaycanın 1,555 milyard dollar mənfi ticarət balansı var.—0—