Pasha Holding-in mehmanxana biznesi Lənkəranda da təmsil olunacaq

Bu yaxınlarda  “Lenkeran Hotel and Resort Company” oteli təsis edilib. Bu, o deməkdir ki, aparıcı  “Pasha Holding” şirkətlər qrupunun mehmanxana biznesi Lənkəranda da təmsil olunacaq.

 2012-ci ilin yayından Azərbaycanda təsisçilərin açıqlanması məxfi sayılır. Lakin hüquqi ünvana (Port Baku Towers) və qanuni nümayəndənin adına görə yeni şirkətin məhz bu holdinqə məxsus olduğunu güman etmək çətin deyil.

Qeyd edək ki, Lənkəranda bir neçə məhşur otel var (Qafqaz Sahil Hotel, Palmalife Lenkaran Resort, AB Qala Hotel, Khan Lenkeran).

Hazırda Gilan Holding bu şəhərdə daha bir nəhəng otel kompleksi inşa edir.

2013-cü ildə  Pasha Holding “Pasha Hotels and Resorts” MMC-nin bazasında ABSHERON Hotel Group-u təsis edib.

Yeni qrupa Bakıdakı Four Seasons, JW Marriott Absheron, həmçinin Şahdağ dağ xizəyi kompleksi (Qusar rayonu) daxildir. Bakıda üç otelin  (İntourist, Dinamo, Boulevard) inşası aparılır.

“Pasha Holding” 2006-cı ildə təsis edilib. Bura ən azı səkiiz şirkət daxildir ki, onların bəzisinin təsisçiləri 60%-dən 100%-dək iştirak payına sahibdirlər.  Holdinqin aktivləri 3 mlrd. manat, səhmdar kapitalı 800 mln. manat təşkil edir. “Pasha Holding”in strukturlarında 2500-dən çox işçi çalışır.