Açiq mənbələrdən foto.
Bakı/04.08.21/Turan: SOCAR Energy Switzerland şirkəti (SOCAR-ın “törəməsi”) İsveçrədə yaşıl hidrogen istehsalı zavodunun tikintisi layihəsində iştirak edəcək, bu, İsveçrənin EW Hofe şirkətinin saytında alman dilində yerləşdirilmiş xəbərdən məlum olur.
“Alpiq, EW Hofe və SOCAR Energy Switzerland şirkətlər konsorsiumu Frayenbax bələdiyyəsində gücü 10MVt-a qədər olan elektroliz zavodu tikməyi planlaşdırır. Zavodun 2022-ci ilin sonlarında istismara verilməsi planlaşdırılır və tam genişlənmədən sonra müəssisə ildə 1 min tondan 1,2 min tona qədər yaşıl hidrogen istehsal edəcək”, deyə EW Hofe-nin məlumatında bildirilir.
Şirkətin məlumatına görə, istehsal edilən hidrogen boru kəməri ilə Fuksberq avtomagistralındakı texniki xidmət stansiyasına göndəriləcək, burada SOCAR hər iki istiqamətdə hidrogendoldurma stansiyaları quraşdıracaq.
“Frayenbaxda isthesal edilən yaşıl hidrogen intensiv hərəkət şəraitində maksimum 200-ə yaxın ticari elektromobili yanacaq elementi ilə təmin edə biləcək. Bu, 14 min tona yaxın karbon dioksid buraxılmasının qarşısını almağa imkan verəcək”, deyə məlumatda bildirilir.
Bundan başqa, bu hidrogenin İsveçrədəki digər hidrogendoldurma stansiyalarına çatdırılması üçün infrastruktur tikiləcək.
“İkinci mərhələdə layihə üzrə tərəfdaşlar həmçinin hidrogen istehsalı zamanı əmələ gələn emal edilmiş istiliyi Energie Ausserschwyz yeni regional mərkəzləşmiş istilik təchizatı şəbəkəsinə tədarük etməyi planlaşdırırlar. Bu, Höfe və Marş bölgələrində 1300-ə yaxın ev təsərrüfatını istiliklə təmin etməyə imkan verəcək”, deyə EW Hofe qeyd edir.
Bundan başqa, şirkətlər EW Hofe-nin mövcud qazpaylayıcı şəbəkəsinə hidrogen əlavə edilməsini sınaqdan çıxarmaq niyyətindədirlər.
“Layihə üzrə tərəfdaşlar hazırda əhali üçün xüsusi informasiya tədbirləri hazırlayır. Bu tədbirlərdə layihə daha ətraflı şəkildə təqdim ediləcək və hidrogen-enerji daşıyıcısı haqqında bütün suallara cavab veriləcək”, deyə məlumatda bildirilir.
Xatırladaq ki, 10 ilə yaxındır SOCAR İsveçrədə neft məhsullarının pərakəndə ticarəti sahəsində fəaliyyət göstərir, SOCAR brendi ilə yanacaqdoldurma stansiyaları şəbəkəsinə malikdir.
SOCAR-ın Ecco Schweiz GmbH şirkətinin səhmlərini almasına dair müqavilə 16 sentyabr 2011-ci il tarixində Sürixdə imzalanıb. Səhmlərin alınması SOCAR-a ümumilikdə 330 mln. dollara başa gəlib.
“SOCAR Trading” ticarət evinin qərargah mənzili Sürixdə yerləşir. -0-
İqtisadiyyat
-
Turan xəbər verir ki, 6 yanvar 2025-ci il tarixindən etibarən Azərbaycandan Bolqarıstana təbii qazın nəqli texniki səbəblərə görə müvəqqəti olaraq dayandırılıb. Bolqarıstanın “Bulgargaz” Enerji Şirkəti tədarükün 2025-ci il yanvarın 11-də bərpa olunacağını elan edib.
-
2024-cü ildə Azərbaycan hava nəqliyyatı vasitəsilə 38 ölkədən 3,523 milyon sərnişin qəbul edib ki, bu da əvvəlki illə müqayisədə 32,1%-lik əhəmiyyətli artımı əks etdirir. Dövlət Turizm Agentliyinin məlumatına görə, ölkəyə gələn ölkələrin sayı üç artırılaraq illik 8,5%-lik genişlənmə əldə olunub.
-
Azərbaycan 2025-ci ildə iqtisadi artım üçün iddialı bir yol xəritəsi təyin edərkən, ölkə öz investisiya portfelini genişləndirmək və innovativ maliyyə alətləri inkişaf etdirmək üçün hazırlaşır. Bu səylər daxili və beynəlxalq investorlar üçün əlverişli mühit yaratmağı hədəfləyir və iqtisadiyyatı neft asılılığından diversifikasiya olunmuş və davamlı inkişafa yönəltməyi nəzərdə tutur.
-
2025-ci ildə Azərbaycan mədəni ənənələri, dini ayinləri və milli xatirə tarixlərini özündə birləşdirən bir sıra dövlət bayramlarını və yas tədbirlərini qeyd edəcək. Nazirlər Kabineti tərəfindən təsdiq edilmiş təqvim vətəndaşlara miraslarını şərəfləndirmək, tarix haqqında düşünmək, ailə və dostları ilə istirahət etmək imkanı verəcək mənalı tarixləri müəyyənləşdirir.
Rəy yaz