Aqrar sahənin sığorta problemi

Dövlət Statistika Komitəsinın avqust ayının 15-də açıqladığı məlumata görə, payızlıq və yazlıq dənli və dənli paxlalı (qarğıdalısız) bitkilərin 98,3 faizi biçilərək məhsulu yığılmış və yığılan məhsulun 1680,3 min tonunu buğda təşkil etmişdir. Müqayisə üçün qeyd edim ki, 2023-cü ilin eyni dövründə buğda istehsal 1828,6 min ton təşkil etmişdir. Hesablamalar göstərir ki, əvvəlki ilə nisbətən bu il buğda istehsalı 148,3 min ton, yəni 8,1% azalmışdır.

Dövlət Gömrük Komitəsinin təqdim etdiyi məlumata əsasən apardığımız hesablamalar göstərdi ki, bu ilin yanvar-iyul aylarında Azərbaycana idxal olunan yeyinti məhsullarının dəyəri ötən ilin eyni dövrü ilə müqayisədə 9,0% çox olmuşdur. Xatırladım ki, ölkəyə 2023-cü ilin yanvar-iyul aylarında 1 milyard 231 milyon 182 min dollar dəyərində, 2024-cü ilin eyni dövründə isə 1 milyard 342 milyon 641 min dollar dəyərində yeyinti məhsulları idxal edilmişdir. Cari ildə əvvəlki ilə nisbətən yeyinti məhsulları idxalı dəyər ifadəsində 111 milyon 459 min dollar çoxalmışdır. Qeyd etləliyəm ki, Azərbaycan yanvar-iyul aylarında yeyinti məhsullarının idxalını son 5 ildə 56,8%, son 10 ildə isə 2,3 dəfə artırmışdır.

Dövlət Statistika Komitəsinin yaydığı məlumatda bildirilir ki, 2024-cü ilin yanvar-iyul aylarında Azərbaycanda 7 milyard 508 milyon manat dəyərində kənd təsərrüfatı məhsulu istehsal edilib ki, bu da ötən ilin eyni dövrü ilə müqayisədə 0,8 % çoxdur. Komitənin məlumatına görə, son bir ildə ölkədə istehsal olunmuş bitkiçilik məhsullarının dəyəri 0,2 % artaraq 3 milyard 836 milyon manat, heyvandarlıq məhsullarının dəyəri isə 1,5% artaraq 3 milyard 671 milyon manat olub.

Dövlət Statistika Komitəsinin bu günlərdə yaydığı məlumatda bildirilir ki, Azərbaycanda qida məhsulları, içkilər və tütün məmulatları üzrə istehlak qiymətləri indeksi 2024-cü ilin iyul ayında əvvəlki aya nisbətən 102,0 faiz, 2023-cü ilin iyul ayına nisbətən isə 100,2 faiz təşkil etmişdir. Yəni iyul ayında əvvəlki aya nisbətən qida məhsulları 2 faiz bahalaşmışdır.