Dünya Bankı Azərbaycanla əməkdaşlığın 25 illiyini qeyd edir

Bakı/19.09.17/Turan: Çərşənbə axşamı Bakıda Dünya Bankının (DB) Azərbaycanla əməkdaşlığının 25 illiyinə həsr olunmuş tədbir keçirilib.

Tədbirdə çıxış edən Azərbaycan Mərkəzi Bankının (AMB) İdarə Heyətinin sədri Elman Rüstəmov deyib ki, bu illər DB Azərbaycana $3,6 mlrd. məbləğində kredit verib.

"Hazırda 10 layihə həyata keçirilir və buna $1,14 mlrd. ayrılıb", - o qeyd edib.

E.Rüstəmov bildirib ki, Azərbaycan iqtisadiyyatının qarşısında yeni çağırışlar var ki, bunların sırasına makroiqtisadi sabitliyin təminatı, iqtisadi artımın yeni modelinin tətbiqi, iqtisadiyyatın diversifikasiyası, insan kapitalının inkişafı, maliyyə sektorunda restrukturizasiyanın başa çatdırılması daxildir.

"Biz yeni çağırışların həllində DB-nin dəstəyinə ümid edirik", - o vurğulayıb.

DB-nin Avropa və Mərkəzi Asiya regionu üzrə vitse-prezidenti Siril Müller qeyd edib ki, son iki il Azərbaycan iqtisadiyyatı üçün mürəkkəb olub.

O hesab edir ki, hökumət belə şəraitdə lazımi addımlar atıb.

S.Müller Azərbaycanın qarşısında duran dörd çağırışı qeyd edib: institusional islahatların gücləndirilməsi və insan kapitalının artırılması, biznes-mühitin yaxşılaşdırılması və maliyyə sektorunun dəstəklənməsi, əmək kadrlarının inkişafı, dövlət sektorunda şəffaflığın artırılması.

Tədbirdə Azərbaycan və DB arasında əməkdaşlığa verdiyi töhfəyə görə baş nazirin müavini Abid Şərifov, Əli Həsənov, iqtisadiyyat naziri Şahin Mustafayev, maliyyə naziri Samir Şərifov, AMB İdarə Heyətinin sədri Elman Rüstəmov və Nazirlər Kabinetinin beynəlxalq maliyyə institutları ilə iş şöbəsinin rəisi Nail Fətəliyev DB-nin xüsusi mükafatları alıblar.

Nazir Ş.Mustafayev bildirib ki, Azərbaycan iqtisadiyyatına qoyulan investisiyalar $200 mlrd.-ı ötüb, o cümlədən birbaşa xarici investisiyalar $76 mlrd. təşkil edib.

O deyib ki, beynəlxalq maliyyə institutları, o cümlədən DB ilə əməkdaşlığın sayəsində Azərbaycan tam olaraq liberal bazara keçə bilib. -71D-