“"Qapadılan dörd bankda sığorta hadisəsi günü 28 aprel hesab olunur", - Əmanətlərin Sığortalanması Fondu”

Bakı/06.07.20/Turan: Qapadılan “NBC” Bankın əmanətçilərindən biri sığortalanmış əmanətləri kompensasiya edərkən əmanətlər üzrə faizlərin düzgün hesablanmamasından şikayətlənib.

“Turan”a müraciət edən Azad Mahmudov depozitlər üzrə faizlərin 18 aprelə qədər hesablandığını bildirdi, halbuki o hesab edir ki, məhkəmə qərarı qüvvəyə minən günə qədər, yəni iyunun 14-ə qədər hesablanmalı idi.

“Fərq iki aydır. Bir çox müştərilər bundan şikayətlənir”, - deyə o öz şikayətində yazıb.

Qapadılan banklar üzrə ləğvedici təyin edilən Əmanətlərin Sığortalanması Fondunun mətbuat xidmətindən bildirdilər ki, onlar Mərkəzi Bankdan gələn məktubu rəhbər tutur.

“Mərkəzi Bank hər dörd bank üzrə sığorta hadisəsini aprelin 28-dən müəyyən edib. Həmin gün Mərkəzi Bank Əmanətlərin Sığortalanması Fonduna müvafiq məktub göndərib. Aprelin 28-də Mərkəzi Bank “Atabank” və “Amrahbank”ın, mayın 12-də isə “NBC” və “AGBank”ın lisenziyarını ləğv edib. Biz özümüz sığorta hadisəsi gününü müəyyən edə bilmərik. Bunu maliyyə tənzimləyicisi qismində Mərkəzi Bank edir”, - deyə Fondun mətbuat xidmətində bildiriblər. –71D-