14 sentyabr günorta saatlarına olan hərbi məlumat

Bakı/14.09.22/Turan: Azərbaycan Ordusunun Kəlbəcər rayonunun Zəylik, Yellicə və Yuxarı Ayrım yaşayış məntəqələri istiqamətlərində yerləşən mövqeləri Ermənistan silahlı qüvvələrinin Basarkeçər rayonunun Yuxarı Şorca, Aşağı Şorca və Zərkənd yaşayış məntəqələri istiqamətlərində yerləşən mövqelərindən D-30 və D-20 toplarından istifadə olunmaqla atəşə tutulur, bu barədə Azərbaycan Müdafiə Nazirliyi sentyabrın 14-də günorta məlumat yayıb.

"Beynəlxalq ictimaiyyətin çağırışlarına və atəşkəs haqqında əldə olunmuş razılaşmaya baxmayaraq, Ermənistan silahlı qüvvələri tərəfindən artilleriya və digər ağır atəş vasitələrindən istifadə olunmaqla sərhədyanı ərazilərdə hücum və təxribatlar davam etdirilir.

Bir daha bəyan edirik ki, vəziyyətin gərginləşdirilməsinə görə bütün məsuliyyət Ermənistanın hərbi-siyasi rəhbərliyinin üzərinə düşür", deyə məlumatda bildirilir.

Azərbaycan Ordusu tərəfindən "yalnız legitim hərbi hədəf olan atəş nöqtələrinə qarşı lokal cavab tədbirləri həyata keçirilir".

Ermənistan mətbuatında guya Azərbaycan Silahlı Qüvvələrinin yaşayış binalarına atəş açması haqqında yayılan məlumatlar əsassızdır və dezinformasiyadır, deyə Azərbaycan Müdafiə Nazirliyinin digər məlumatında qeyd edilir. 06B