31 il sonra siyasətçilərin və ekspertlərin “Qara Yanvar” haqqında rəyləri

Bakı/20.01.21/Turan: İnsanlar küçələrə çıxıblar ki, Azərbaycan müstəqil olsun. İlk şəhidlər məhz bunun uğrunda canını fəda edənlərdir. Bu milli-azadlıq hərəkatı nəticəsində Azərbaycan müstəqil dövlət olub. “Bu gün Azərbaycan öz qüvvəsi ilə torpaqlarını azad edibsə, deməli şəhidlərin qisası alınıb”. Bu barədə 90-cı illərin əvvəllərində milli hərəkatın rəhbərlərindən biri olmuş Milli Müstəqillik Partiyasının lideri Etibar Məmmədov bildirib.

Xalq Cəbhəsi Partiyasının lideri Əli Kərimlinin fikrincə, xalqın azadlıq arzusu o qədər güclü idi ki, heç bir qüvvə onu qorxuda bilməzdi. “Həmin gecə xalqımız müstəqillik naminə kütləvi şəkildə və bilə-bilə ölümə doğru gedirdi. Ölümdən qorxmayanlara qalib gəlmək qeyri-mümkündür. Buna görə, çoxsaylı qurbanlara baxmayaraq, biz məğlub olmadıq. Azərbaycan xalqı qalib gəldi”, deyə Kərimli bildirib.

Şərq-Qərb Araşdırmalar Mərkəzinin rəhbəri Ərəstun Oruclu hesab edir ki, yanvarın 20-də daha iki hadisə SSRİ-nin altına qoyulmuş dinamit rolunu oynayıb. Söhbət Sovet-İran sərhədinin yıxılmasından və SİKP üzvü biletlərinin nümayişkaranə şəkildə məhv edilməsindən gedir.

Parlamentin sabiq spikeri, Milli Strateji Düşüncə Mərkəzinin rəhbəri İsa Qəmbər hesab edir ki, Azərbaycan üçün “20 yanvar bitməyib”. “Çünki Azərbaycanı gerçək müstəqil həyatı ilə yaşamağa imkan verməyən Rusiya imperializmi mövcudluğunu davam etdirir.

Vəzifə naminə, hakimiyyət naminə Moskvanın hər bir tapşırığını həyata keçirməyə hazır olan şəxslər Azərbaycanda hakimiyyətdə əyləşiblər. Sabah onlara deyilsə, SSRİ-nin bərpasına da imza atarlar, rus ordusunun Azərbaycana gəlməsinə də imza atarlar.

20 Yanvarı doğuran şərtlər bu gün bütün gücü ilə ortadadır”, deyə Qəmbər öz Facebook səhifəsində yazıb. -06D-