Açıq mənbələrdən foto
600-ə yaxın Azərbaycan vətəndaşı Dərbənddə çətin vəziyyətdədir (Video)
Bakı/06.05.20/Turan: Karantin rejimi ilə əlaqədar qadağa səbəbindən ölkəyə qayıda bilməyən 600-ə yaxın Azərbaycan vətəndaşı Dağıstanda Azərbaycan-Rusiya sərhəddində toplaşıb. Son günlər onlar faktiki olaraq Dərbənd rayonunun Qullar qəsəbəsi yaxınlığında küçədə qalıblar.
Onlardan biri, Emin Aslanov Turan-a bildirib ki, Dərbənd azərbaycanlıları onları öz mehmanxanalarında yerləşdirərək sığınacaq veriblər. Yerli sahibkarlar da adamların qidalanmasını öz üzərinə götürüblər. E.Aslanov Dərbəndə aprelin 20-də gəlib.
“Bu müddətdə bizə kömək edən hər kəsə çox minnətdarıq. Ancaq sonsuzadək burada qala bilmərik. Mayın 1-də məlumat gəldi ki, sərhəd açılacaq. Hamımız sərhədə getdik. Ancaq burada, Qullar kəndində (sərhəddən 20 km. aralı) bir post qoyulub və bizi buradan o tərəfə buraxmadılar. Beş gündür demək olar ki, küçədə yaşayırıq”, - E.Aslanov deyib.
“Kimin öz avtomobili var, avtomobillərdə gecələyir. Qalanları yarımçıq tikililərdə, avtomobil anqarlarında və ya açıq yerlərdə məskunlaşıb. Gecələr adamlar tonqal qalayaraq qızınırlar. İnsanlar çıxılmaz vəziyyətə düşüblər, çünki bunun nə qədər davam edəcəyini bilmirlər. Bir çoxu ailəsi ilə buradadır”.
Azərbaycan Nazirlər Kabineti yanında Operativ Qərargahdan Turan-ın müxbirinə bildiriblər ki, karantin rejiminə görə sərhəd bağlı qalır. Azərbaycan vətəndaşları yalnız mütəşəkkil qaydada diplomatik nümayəndəliklərdə qeydiyyatdan keçərək qayıda bilər.
Rusiyadan qayıdanlar https://www.evegedirem.info/ portalında qeydiyyatdan keçə bilər. Dönüş karantin zonalarının müəyyən sayda insanı qəbul etməyə hazır olması baxımından baş tutur. Hər həftə 200-500 vətəndaşın geri qayıtması təmin edilir. Pandemiya başlayandan 15 mindən çox Azərbaycan vətəndaşı geri qayıdıb, - Əməliyyat Qərargahından bildiriblər.
Dərbənddə olan azərbaycanlılar deyirlər ki, bu portalda qeydiyyat aviareyslərlə qayıdışı da nəzərdə tutur, ancaq biletlərin qiyməti 30-40 min rubla çatır ki, bu da çoxları üçün münasib deyil.
“Digər tərəfdən biz özümüz sərhədə çatmışıq. Problem nədir, qoy, bizi buraxsınlar, karantini gözləməyə hazırıq. Qoy, bizi çadırlara yerləşdirsinlər. Ancaq bir müəyyənlik olacaq, biləcəyik ki, iki həftədən sonra evimizə qayıdacağıq”, - digər Azərbaycan vətəndaşı deyib.
Dərbənd rayonu icra başçısının səlahiyyətlərinin icraçısı Fuad Şıxıyev mayın 3-də İnstaqram səhifəsində bildirib ki, rayon ərazisində sərhəddin açılmasını gözləyən 600-ə yaxın Azərbaycan vətəndaşı var. Onlar evə qayıtmaq üçün dəhlizin açılmasını gözləyirlər. O qeyd edib ki, Azərbaycan vətəndaşları “4 mayda sərhəddin açılacağını bildirən qohumlarının sözləri ilə çaş-baş qalıblar”.
F.Şıxıyev qeyd edib ki, hələlik heç kim dəhlizin açılması üçün dəqiq tarix verə bilməz. O, Azərbaycan vətəndaşlarına müraciət edərək dövlət sərhəddinin açılması barədə rəsmi elan olana qədər Rusiyadakı yaşayış yerlərində qalmalarını xahiş edib.
Mayın 5-də F.Şıxıyev bildirib ki, 600-ə yaxın Azərbaycan vətəndaşı yenidən mehmanxanalara və sanatoriyalara yerləşir. Səhrəd açılana qədər orada qalacaqlar. Eyni zamanda onlar qida, gündəlik məişət əşyaları ilə təmin olunacaqlar.06B-
Siyasət
-
Azərbaycan bu həftə Fransada keçirilən Fransızofoniya Sammitindən sonra Ermənistana təxribatçı hərəkətlərdən çəkinməyə və ya normallaşma prosesini tamamlamaq, ya da qarşıdurma yolunu seçmək arasında qərar verməyə çağırıb.
-
Milli Məclisin 43 deputatı xarici işlər naziri Ceyhun Bayramova müraciət edərək, ABŞ-la münasibətlərə yenidən baxılması və müdafiə sahəsində əməkdaşlığa dair sazişlərin denonsasiyası çağırışı ilə çıxış edib.
-
Prezident İlham Əliyev 2024-2025-ci tədris ilində Azərbaycan Respublikasının ali təhsil müəssisələrinə daxil olan tələbələrə prezident təqaüdlərinin verilməsi haqqında sərəncam imzalayıb.
-
Oktyabrın 4-də Azərbaycanın Rusiyada yeni fövqəladə və səlahiyyətli səfiri Rəhman Mustafayev Rusiya xarici işlər naziri Sergey Lavrov tərəfindən qəbul edilib.
Rəy yaz