Abdullahiyan: “İran Krımın və dörd regionun Rusiyaya daxil edilməsini tanımır”

Bakı/19.01.23/Turan: İranın xarici işlər naziri Hüseyn Abdullahiyan deyib ki, Tehran Krımın, eləcə də Luqansk, Donetsk, Zaporojye və Xerson vilayətlərinin Rusiyanın tərkibinə daxil olmasını tanımır. Bu barədə o, TRT World agentliyinə bildirib.

Onun sözlərinə görə, Rusiya ilə sıx münasibətlərə baxmayaraq, İran ölkələrin suverenliyini və ərazi bütövlüyünü tanıyır.

Bundan öncə İrandakı bəzi mühafizəkarlar və jurnalistlər Ukraynada təcavüzkarın Rusiya olduğunu deyərək Rusiyaya pilotsuz təyyarələrin göndərilməsinin əleyhinə olduqlarını bildiriblər.

Əsasən “Jomhouri-e-Islami” qəzetinin redaktoru Məsih Mohaceri deyib ki, Tehran “müharibəni başlayan tərəfə beynəlxalq qaydalara riayət etməyi tövsiyə etməlidir”.

Bundan əlavə, onun sözlərinə görə, Rusiyanın Ukraynada İran pilotsuz təyyarələrindən istifadə etmək hüququ yoxdur. Mohaceri həmçinin təkid edir ki, İran Rusiya hakimiyyətinin hərəkətlərini açıq şəkildə pisləsin. O, İranın pilotsuz təyyarələrinin Ukraynaya göndərilməsini təklif edir. 02D