ABŞ Azərbaycan-Ermənistan sərhədində zorakılığı pisləyib

Bakı/14.07.20/Turan: ABŞ Dövlət Departamenti bazar ertəsi Vaşinqtonun Ermənistan-Azərbaycan beynəlxalq sərhədində baş verən zorakılıqları ən qəti şəkildə qınadığını bəyan edib.

“Biz tərəfləri dərhal qüvvədən istfadəni dayandırmağa, mövcud birbaşa əlaqə kanallarından istifadə edərək gərginliyin qarşısını almağa və atəşkəsə ciddi şəkildə riayət etməyə çağırırıq”, deyə Dövlət Departamentinin rəsmi nümayəndəsi Morqan Ortaqus bildirib.

ATƏT-in Minsk Qrupunun həmsədri olaraq Birləşmiş Ştatlar “Dağlıq Qarabağ münaqişəsinin sülh yolu ilə möhkəm həllinə nail olmaqda tərəflərə köməklik edilməsinə sadiq qalır. Biz həmin məqsədə nail olmaq üçün fəal şəkildə səylərimizi davam etdirəcəyik”.

“ABŞ Minsk Qrupu həmsdərlərinin mahiyyəti üzrə danışıqları bərpa etmək çağırışına qoşularaq, tez bir zamanda ATƏT müşahidəçilərinin regiona qayıtmasının əhəmiyyətini vurğulayır”, deyə onun bəyanatında bildirilir. -25В-